لورالائی شار اٹی سفائی، خرسی و ماڈل سٹی نا بابت گام گیج آک برجا

ورالائی، کمشنر لورالائی ڈویژن ولی محمد بڑیچ و ضلعی انتظامیہ نا پارت وخت اس کہ چیف آفیسر میونسپل کمیٹی محب اللہ بلوچ نا خصوصی چاروکی و پارت آ لورالائی شار ءِ سفا، سرسوز و ماڈل سٹی جوڑ کننگ کن سفائی نا کاریم برجا ءِ۔ میونسپل کمیٹی نا سفائی کارندہ غاتا کنڈ آن شار انا جتا جتا زون تے ٹی کھدکتر نا سفائی، نالی تا سفائی، کسر و بازار آتا سفائی، کھدکتر تے ہرفنگ و کسر تا کرّک آتا جوانی نا کاریم برجا تخنگا۔ کمشنر ہاؤس، طوف روڈ، ڈپٹی کمشنر آفس و جتا جتا ہند آتیا ہم سفائی و دیر چٹکار کننگا۔ ہندا وڑ سلیم داد ولی کمپلینٹ زون، دارالعلوم روڈ، صدر بازار، باگی بازار، کاکڑی مسجد روڈ، ڈاکخانہ روڈ، تحصیل روڈ، سبزی منڈی، بخمہ محلہ، انور صاحب گلی و پولیس لائن تون اوار چندی علاقہ غاتیٹی نالی و کھدکتر نا سفائی کننگا۔ باران زون اٹی فٹبال اسٹیڈیم نا سفائی تون اوار کسر نا کرّک آ مِش شاغنگ نا کاریم ہم کننگا، وخت اس کہ شار اٹی خلوک درخت آتے دیر تننگ نا ریسہ ہم برجا ءِ۔ میونسپل کمیٹی نا کنڈ آن شار اٹی یلئی آ کچک آتے چٹفنگ کن کارروائی آن پد کہوک کچک آتے دننگ خسنگ نا عمل ءِ ہم پورو کننگا۔ کمشنر لورالائی ڈویژن ولی محمد بڑیچ پارینے کہ سفا و زیبا لورالائی شاری تا حق ءِ‘ شار انا سفائی کن کل دوئی وسیلہ غاتے کاریم اٹ اتنگ انگ ءِ‘ او تعلقدار ادارہ غاتے سفائی نا آب ءِ برجا تخنگ و ہڑدے ئی بنداو آ سفائی نا کاریم تے برجا تخنگ نا پارت کرے۔ چیف آفیسر محب اللہ بلوچ پارے کہ میونسپل کمیٹی نا کارندہ غاک شار انا جتا جتا علاقہ غاتیٹی پدریسہ متحرک ءُ‘ سفائی تون اوار درخت آتا سنبھالنگ و شاری چاگڑد نا جوانی آ ہم خصوصی چکار کننگ انگ ءِ۔