جمعیت بلوچستان حکومت اٹ اوار مفک، محسن نقوی بایدے استیفہ ایتے،مولانا فضل الرحمن

جمعیت علمائے اسلام (ف) نا سروک مولانا فضل الرحمن پارینے کہ پاکستان خاص وڑ اٹ بلوچستان و خیبر پختونخوا ٹی حکومتی رٹ اف، وخت اس کہ ملک انا کل ویل آتا اسٹ انگا ایسری آئین آ عملدرآمد و قومی سلاہ ءِ‘ او پارے کہ واک انا کاریم اٹ اتنگ آن ہچ گہس ویل آک ایسر مفسہ و الس ءِ تینا علاقہ غاتیٹی ہن و بر اٹی خواری مون تروئی تمک۔ کوئٹہ ٹی پریس کانفرنس آن تران کرسا مولانا فضل الرحمن تون صوبائی امیر سینیٹر مولانا عبدالواسع، اپوزیشن لیڈر یونس عزیز و ایلو راہشونک ہم ساڑی ئسر۔ او پارے کہ کشمیر نا حالیت ہم جوان اف و ہمو جاگہ نا الس پاکستان نا کنڈ آ اومیت نا نظر اٹ ہننگ اٹی ءِ‘۔ پوسکن آ صوبہ غاتا جوڑ کننگ نابابت او پارے کہ دا انتظامی باندات المی ءِ‘ ولے دا بابت تعلقدار الس نا سلاہ ہلنگ المی ءِ‘ او پارے کہ صوبہ غاک “کیک کاٹ کرسا” جوڑ مفسہ بلکن ہر فیصلہ سلاہ اٹ مریک و قوم تا پجار ءِ گوجالنگ مفک۔ مولانا فضل الرحمن پارے کہ محمود خان اچکزئی اپوزیشن لیڈر ءِ بایدے او اپوزیشن جماعت آتا دیوان بٹنگسا اسیجائی سج پام ترتیب ایتے۔ او مستی پارے کہ پاکستان اٹی سیاستدان آتے کاریم کننگ نا وارخواہی تننگپک‘ پارلیمنٹ نا اہمیت چٹانے و ملک ءِ آئین نا رِد اٹ چلیفنگ وخت انا گرج ءِ۔ او بنجائی وزیر داخلہ محسن نقوی آ تنقید کرسا پارے کہ اگہ او تکِک کہ ساڑی نظام بے سہب مسنے تو او بایدے کابینہ غان استیفہ ایتے۔ او پارے کہ مارشل لا نا دور تیٹی آئین ءِ نسخان رسیفنگا، وخت اس کہ جمعیت علمائے اسلام 26 میکو آئینی ترمیم آ حکومت تون مذاکرات کرینے و آخبت اٹی ہم تینا آئینی و سیاسی جہد ءِ برجا تخک۔ مولانا فضل الرحمن پیدوار کرے کہ جمعیت علمائے اسلام بلوچستان اٹی حکومت نا بشخ مفک‘ او پارے کہ الس نا اومیت آک اینو ہم جمعیت تون گنڈوک ءُ۔ ڈاکٹر مالک بلوچ تون اوڑدہی نا حوال ءِ پک کرسا او پارے کہ اودے دا ہیت انا سما اف کہ ڈاکٹر مالک بلوچ وزیراعلیٰ جوڑ مننگ اٹی ءِ یا آخا۔