پاکستان و ایران نا نیام اٹ واپار نا کچ ءِ 10 ارب ڈالر اسکان ودفنہ،جام کمال خان

بنجائی واپار وزیر جام کمال خان پارینے کہ پاکستان و ایران نا نیام اٹ ہڑتوم آ کنڈآتا واپار نا کچ ءِ 10 ارب ڈالر اسکان ودفنہ، ہڑتوم آ ملک آتا تاریخی ایلمی تعلقداری تے سوگو زرگزرانی شریداری ٹی بدل کننگ وخت انا گرج ءِ۔ دا خیال آتا درشانی ءِ او سے شنبے نادے آ ہندی ہوٹل اٹی ایرانی وزیر صنعت و واپار ڈاکٹر محمد اتابک تون اوار 10 مینو پاکستان ایران جوائنٹ ٹریڈ کمیشن نا دیوان نا اسیجائی کماشی ءِ کرسا کرے۔ فورم آن تران کرسا جام کمال خان پارے کہ پاک ایران فری ٹریڈ ایگریمنٹ ءِ زوت گڈیکو دروشم اس تننگک و ہڑتوم آ ملک آتا نیام اٹ بارٹر ٹریڈ اٹ ہم ودکی کننگک۔ او پارے کہ سیمی لاجسٹکس، کسٹمز و کارگو نا ہن و بر اٹ مون تروک اڑاند آتے چٹفنگ المی ءِ، اسیجائی سیمی منڈی تا جوڑ کننگ و الیکٹرانک ڈیٹا انٹرچینج آن ہڑتوم آ کنڈآتا واپار اٹ نمان ودکی اس مریک۔ جام کمال خان پارے کہ ہڑتوم آ ملک آتا نجی بشخ واپار کن تیار ءُ، حکومت آتا زمواری گچین و پتدار کاروباری چاگڑد تننگ ءِ۔ او پارے کہ 10 مینو جے ٹی سی دیوان عمل نا قابل روڈ میپ اس جوڑ کرسا زرگرانی کمکاری ءِ پوسکن آ بڑزی تسکان دیک۔ جام کمال پارے کہ واپاری سرجز آتے کن پاکستان و ایران نا پرائیویٹ ادارہ غاتا است بڈی ءِ کننگ انگ ءِ، پاک ایران واپار اٹ ہم ودکی مننگ ءِ۔ او پارے کہ واپار نا مون آ دننگ کن گچین چاگڑد نا فراوانی ءِ پک کننگ انگ ءِ۔ فورم آن تران کرسا ایران نا وزیر واپار محمد اتابک پارے کہ واپار کن اسیجائی کسر تا گرج ءِ، نن تینا ہمسائے تتون گچین تعلقداری خاص وڑ اٹ پاکستان تون ہڑتوم آ کنڈآتا واپاری تعلقداری تے مثبت وڑ اٹ مونی دننگ خوانہ۔ او پارے کہ ہڑتوم آ کنڈآتا واپار ءِ پوسکن آ بڑزی تسکان دننگ کن سنبرینگوک اُن، واپار و زرگزران نا گچینی کن اسہ ایلو نا آزموندہ غاتیان فائدہ ہرفنہ۔ محمد اتابک پارے کہ نن واپار نا پوسکن آ دور اسے ٹی ہننگ اُن، پاکستان تون گچین اسٹریٹجک پارٹنرشپ خوانہ، ہڑتوم آ ملک آتا سنگتی ءِ مدامگی زرگزرانی شریداری ٹی بدل کننگ ناءِ۔ ڈاکٹر محمد اتابک کراچی و گوادر بندرگاہ تا کمک اٹ علاقائی واپار و لاجسٹک کمکاری ءِ ودفنگ نا است خواہی نا ہم درشانی ءِ کرے۔ ایرانی وزیر پاک ایران فری ٹریڈ ایگریمنٹ زوت پورو مننگ نا اومیت درشان کرے۔ ڈاکٹر محمد اتابک بجلی نا واپار و علاقائی رابطہ غاتے ہڑتوم آ ملک آتے کن پوسکن آ زرگزرانی وارخواہی گوندا۔