بلوچستان یونیورسٹی نا رینکنگ اٹ ودکی ستا کڑزوک سرسہبی اسے،گورنر جعفرخان مندوخیل

گورنر بلوچستان جعفر خان مندوخیل پارینے کہ یونیورسٹی آف بلوچستان نا رینکنگ و اسکورنگ ءِ 42 درسَد آن ودفسا 82 درسَد اسکان اسکان رسیفنگ اسہ گمان آن چَٖپ و ستا کڑزوک سرسہبی اسے۔ دا نمان پیش رفت بھرمی سرکڑدہی‘ جوان انتظامی اسٹریٹجی و تعلیمی آب اٹی پدریسہ گچینی نا ڈیک ءِ‘ ہندا سوب آن المی ءِ کہ وائس چانسلر ڈاکٹر ظہور بازی و اونا مچ آ ٹیم تینا پبی چکار ءِ یونیورسٹی نا تعلیمی آب ءِ پین بڑز کننگ، بے گرج خڑچ آتیٹی کمتی اتنگ و مالی نظم و ضبط ءِ سوگو کننگ آ تخر۔ دا خیال آتا درشانی ءِ او یونیورسٹی آف بلوچستان نا 13 میکو سینیٹ دیوان نا کماشی ءِ کرسا کرے۔ یونیورسٹی آف بلوچستان نا 13 میکو سینیٹ دیوان اٹی چیف جسٹس بلوچستان ہائی کورٹ جسٹس کامران خان ملاخیل، صوبائی وزیر تعلیم راحیلہ حمید خان درانی، وائس چانسلر ڈاکٹر ظہور احمد بازی، صوبائی سیکرٹری ہائیر ایجوکیشن صالح بلوچ، ہائیر ایجوکیشن کمیشن نا نمائندہ حسنین، پرنسپل سیکرٹری ٹو گورنر بلوچستان عبدالناصر دوتانی، ایڈیشنل سیکرٹری ہائیر ایجوکیشن جہانزیب مندوخیل، ایڈیشنل سیکرٹری جمیل احمد، پرو وائس چانسلر ڈاکٹر غلام الرزاق و رجسٹرار گل کاکڑ تون اوار کل سینیٹ باسک آک ساڑی ئسر۔ یات سلے کہ گورنر بلوچستان، چیف جسٹس بلوچستان ہائی کورٹ و صوبائی وزیر تعلیم یونیورسٹی آف بلوچستان نا کساس پنچ گھنٹہ نا بھلا سینیٹ دیوان اٹی اخیر اسکان ساڑی ئسر ہرا تعلیم دوستی و تینا صوبہ نا ورنا تا روشنا آخبت ءِ پک کننگ کن اوفتا عزم انا درشانی ءِ۔ شریدار آتتون ہیت وگپ کرسا گورنر بلوچستان جعفر خان مندوخیل پارے کہ یونیورسٹی آف بلوچستان نا کٹیا ٹی ودکی کن جتا جتا انڈسٹری، فارماسیوٹیکل ادارہ، زرعی تحقیقاتی ہند و ایلو تعلقدار بشخ آتتون رابطہ کننگے تانکہ ریسرچ، پوسکنوڑ‘روزگار و مالی وسیلہ غاتا پوسکن وارخواہی ودی کننگ مرے‘ یونیورسٹی ءِ مالی وڑ اٹ پین وتواجہ جوڑ کننگ مرے۔ او پارے کہ یونیورسٹی آف بلوچستان صوبہ نا اولیکو یونیورسٹی ءِ ہرا ڈیجیٹل ٹرانسفارمیشن نا رِد اٹ تینا انتظامی و دفتری نظام ءِ پورو وڑ اٹ پیپر لیس جوڑ کرینے ہرا وائس چانسلر ڈاکٹر ظہور احمد بازی و اونا مچ آ ٹیم نا اسہ ستا کڑزوک و چاگڑد دوست گام اسے۔