بلوچستان ہر وڑ اٹ اہم ءِ، زرکاری، صنعت و واپار ءِ شون تننگک،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی نا کماشی ٹی بلوچستان بورڈ آف انویسٹمنٹ اینڈ ٹریڈ نا بورڈ آف ڈائریکٹرز نا دیوان دوشنبے نادے چیف منسٹر سیکرٹریٹ اٹی اڈ ہلک۔ دیوان اٹی چیف سیکرٹری بلوچستان شکیل قادر خان، ایڈیشنل چیف سیکرٹری شونداری و ڈٹ بندی زاہد سلیم، بلوچستان بورڈ آف انویسٹمنٹ اینڈ ٹریڈ نا وائس چیئرمین بلاول خان کاکڑ، چیف ایگزیکٹو آفیسر قائم خان لاشاری، پرنسپل سیکرٹری عمران زرکون و تعلقدار بڑزکو کمامدار آک بشخ ہلکر۔ دیوان اٹی بلوچستان بورڈ آف انویسٹمنٹ اینڈ ٹریڈ نا جتا جتا ایجنڈہ تیا سرجم سجفنگا وخت اس کہ بورڈ آف گورنرز جتا جتا مالی و انتظامی باندات نا منظوری ہم تس۔ دا وخت آ تران کرسا وزیراعلیٰ بلوچستان میر سرفراز بگٹی پارے کہ بلوچستان اٹی زرکاری نا شونداری و واپار نا وارخواہی تیٹی ودکی حکومت نا اہم اولیت آتیٹی اوار ءِ۔ او پارے کہ زرکار آتے جوان، شفاف و کاروبار دوست چاگڑد نا فراوانی کن کل تعلقدار ادارہ غاک تین پہ تینی ہم گرنچی اٹ کاریم کیر۔ وزیراعلیٰ پارے کہ بلوچستان قدرتی وسیلہ، جغرافیائی اہمیت و زرگزرانی گمان تا رداٹ بے کچ لائخی تخوک صوبہ اسے، ہراڑان پبی فائدہ ہرفسا زرکاری، صنعت و واپار ءِ شون تننگک۔ او پارت کرے کہ بلوچستان بورڈ آف انویسٹمنٹ اینڈ ٹریڈ زرکار آتے آسراتی فراوان کننگ، زرکاری نا عمل ءِ آسان کننگ و پرائیویٹ بشخ انا پت ءِ پین سوگو کننگ کن بھرمی گام گیج کے۔ میر سرفراز بگٹی دا عزم انا درشانی ءِ کرے کہ حکومت بلوچستان زرکاری نا شون، روزگار نا پوسکن آ وارخواہی و مدامگی زرگزرانی شونداری کن ہر وڑ انا گام گیج آتے برجا تخک۔