جنگ سلہہ کچ ءِ کم کتنے، نن تون دنیا نا ہر اسہ ملک آن زیات سلہہ ارے، امریکی صدر ڈونلڈ ٹرمپ

امریکی صدر ڈونلڈ ٹرمپ جنگی سلہہ غاتا کمتی نا بابت حوال آتا تردید ءِ کرسا دعویٰ کرینے کہ نن تون دنیا نا ہر اسہ ملک آن زیات سلہہ ارے‘ امریکی اخبار دی وال اسٹریٹ جرنل ءِ تروک اسہ انٹرویو اسے ٹی صدر ٹرمپ پارے کہ نن تون دنیا نا ہر ملک آن کیہی ہموخس زیات سلہہ ارے، بلکن ننا گرج آن ہم زیات سلہہ ارے۔ ٹرمپ نا دا بیان ہمو وخت اس مون آ بس ہراتم اخبار تینا رپورٹ اٹی دعویٰ کریسس کہ نائب صدر جے ڈی وینس و جوائنٹ چیفس آف اسٹاف نا چیئرمین جنرل ڈین کین وائٹ ہاؤس ءِ ایران تون برجا چک وتاڑ نا وخت آ امریکی فضائی رکھی نظام اٹی کاریم اٹ بروک آ انٹرسیپٹر میزائل آتا کوڑی تے ٹی کمتی نا بابت بریفنگ تسوسر۔ دا بریفنگ آن پد امریکی صدر ایران نا برخلاف کساس 2 ہفتہ غان برجا فوجی کارروائی تے تورینے۔ داکان مست حوال آک ئسر کہ امریکہ نا جوائنٹ چیفس آف اسٹاف نا چیئرمین جنرل ڈین کین خبڑدار کرینے کہ ایران نا برخلاف بھلو کچ اسے ٹی فوجی کارروائی تے دوارہ بنا کننگ کیک ولے داڑان امریکی فوج انا میزائل آتا کوڑیک گڑتی نا کچ اسکان کم مریرہ۔ اسہ سینئر عہدیدار اس پن ءِ پاش کپننگ نا شڑت آ پارے کہ ایران آ جلہو آتا بھرم اومیت آتیان چَپ مون آبس‘ امریکی جلہو آک ایران ءِ تہہ آن سوگو مننگ و ایرانی راہشون تے پیشن نا خطرہ غاتیا چکار کننگ نا وارخواہی تننگ اٹی ءُ۔ یات سلے کہ تدوک آ دے دا حوال مون آ بس کہ امریکہ نا صدر ڈونلڈ ٹرمپ ایران آ جلہو آتے توننگ نا پرمان کرینے۔ امریکی میڈیا نا رِد اٹ 13 دے آن برجا کارروائی ءِ توننگ نا پرمان جمعہ نا دے تننگا۔ داسکان دا پیدوار اف کہ دا جلہو آک اسہ دے اکن توننگانو یا جنگ بندی کننگانے۔ جنگ انا بابت اسہ سروے اسے نا رِد اٹ 76 درسَد امریکی تا خیال ءِ کہ امریکہ و ایران نا نیام اٹی برجا جنگ ٹرمپ انتظامیہ نا اومیت آتیان کیہی ہموخس زیات سخت پک مسنے۔ امریکی شینکاری ادارہ سی بی ایس نیوز و یوگوو نا کنڈ آن 22 آن 24 جولائی نا نیام اٹی کروک سروے ٹی 20 درسَد سلاہ تروک آک پاریر کہ جنگ اومیت آتا رِد اٹ مسنے وخت اس کہ بیرہ 4 درسَد نا خیال ٹتی دا اومیت آن زیات آسان پک مس۔ 58 درسَد پارے کہ او برجا چک وتاڑ نا بابت بے یقینی نا گواچی ءُ، وخت اس کہ 57 درسَد پارے کہ او نااومیت مننگ اٹی ءُ۔ داکان بیدس 36 درسَد نااستی نا درشانی ءِ کریر‘ وخت اس کہ بیرہ 19 درسَد پارے کہ اوفتا اومیت آک اریر۔ سروے ٹی 22 درسَد سلاہ تروک آتا خیال ئس کہ دا جنگ اٹی ایران زیات سوگو یا جوان پوزیشن اٹی ءِ۔