آپریشن “العزم” نا ر داٹ کارروائی تیٹی 10 دہشت گرد خلنگار،آئی ایس پی آر

بلوچستان اٹی برجا آپریشن “العزم” نا رِد اٹ کارروائیک ترندی اٹ برجا ءُ، دہشت گردی نا چٹفنگ و امن و ایمنی کن سیکورٹی فورس آتاکنڈ آن انٹیلی جنس آ تالان کارروائی تا ردوریسہ پدریسہ برجا ءِ۔ داسہ نا کارروائی تیٹی ضلع خضدار نا تحصیل انجیرہ و ضلع سوراب اٹی فتنہ الہندوستان (بی ایل اے) تون تعلقدار جم وڑ اٹ 10 دہشت گرد خلنگار، وخت اس کہ اوفتیان بھلو کچ اسے ٹی سلہہ، منچر‘ مواصلاتی ازباب و سیٹلائٹ ٹیل فون ہم دوئی کننگا۔ پاک فوج انا شعبہ تعلقات عامہ (آئی ایس پی آر) نا رِد اٹ سیکورٹی ادارہ غاتے خضدار نا اسہ علاقہ اسے ٹی دہشت گرد آتا ہن وبر نا بابت اودیم معلومداری رسینگا، ہراڑا دمدستی وڑ اٹ انٹیلی جنس بیسڈ آپریشن (IBO) کننگا۔ حوال آتا رِد اٹ دہشت گرد تینا رکھی ہند انا کنڈ آ ہننگ اٹی ئسر، ولے سیکورٹی فورس آک پیشگی سُج پام نا رِد اٹ کسر اٹی اوفتے گھیڑ کریر‘ ہرانا سوب آن ہڑتوم آ کنڈآن بھاز سم کاری مس۔ آئی ایس پی آر نا رِد اٹ کارروائی نا وخت آ بی ایل اے تون تعلقدار8 دہشت گرد خلنگار۔ فورس آک دہشت گرد آتا نرنگ و تینا ہند اسکان سرمننگ نا ڈٹ ءِ بے سہب کرسا علاقہ نا پورو کنٹرول ءِ دوئی کریر‘ کارروائی آن پد دہشت گرد آتا کاریم اٹ اتوک جتا جتا ہند آتا تلاشی ہلنگا ہراکان بھلو کچ اسے ٹی پوسکنوڑ سلہہ، منچر‘ دستی بمب، تینٹ جوڑ کروک سلہہ‘ مواصلاتی ازباب و سیٹلائٹ ٹیل فون دوئی کننگا۔ ایلو کنڈ آ یو این اے نا رِد اٹ ضلع سوراب نا علاقہ حاجیکہ ٹی ہم سیکورٹی فورس آک اسہ سرسہب انٹیلی جنس بیسڈ کارروائی اسے ٹی فتنہ الہندوستان (بی ایل اے) نا اِرا دہشت گرد ءِ خلکر۔ کارروائی نا وخت آ دہشت گرد آتیان سلہہ و پین جنگی گڑا ہم دوئی کننگا۔ آئی ایس پی آر پارینے کہ خلنگوک دہشت گرد آک جتا جتا دہشت گردی نا کارروائی، سیکورٹی فورس آتیا جلہو و کودک آ شاری تے شست کننگ نا کیہی واردات آتا زموار ئسر۔