ڈیجیٹل کانٹنٹ کری ایشن گرج اسے، پوسکن ءُ پالیسی اس اتنگ اُن، عطاء اللہ تارڑ

بنجائی وزیر حوالکاری و شینکاری عطاء اللہ تارڑ نیشنل پریس کلب نا ویب سائٹ نا بناءِ کرے۔ او پارے کہ ڈیجیٹل کانٹنٹ کری ایشن ساڑی دور نا اہم ءُ گرج اس جوڑ مسنے، ولے الیکٹرانک و پرنٹ میڈیا نا سوگوی و رکھ ءِ پک کننگ ہم حکومت نا اولیکو اولیت آتیٹی اوار ءِ۔ حکومت صحافی و میڈیا ادارہ غاتے مون تروک مالی ویل آتا ایسری کن پوسکن ءُ پالیسی اس جوڑ کننگ اٹی ءِ‘ وخت اس کہ صحافی تا کسبی لائخی تیٹی ودکی کن شارٹ کورسز ہم دراستی راستی کرفنگیک۔ بنجائی وزیر حوالکاری صحافی تتون ہیت وگپ کرسا پارے کہ صحافی تا ہاؤسنگ نا باندات آ سنجیدہ وڑ اٹ سُج پام برجا ءِ‘ و دا بابت کل فیصلہ غاک صحافتی تنظیم و نمائندہ غاتا سلاہ و مشورہ اٹ کننگرہ تانکہ ویل آتا مدامگی ایسری پک مننگ کے۔ عطاء اللہ تارڑ پارے کہ مسکوہی حکومت نا 2019 نا میڈیا پالیسی نا سوب آن میڈیا انڈسٹری بھاز مالی تنکی نا گواچی مس، اشتہار آتا نہاد آتے کم کننگا، نیشنل پریس کلب نا فنڈ آتے کچ اٹ کننگا و کیہی صحافیک بے روزگار مسر۔ او پارے کہ ساڑی حکومت نا دور اٹی اسہ ٹی وی چینل یا اخبار اسے نا اشتہار تے بند کننگتنے۔ او پارے کہ بھاز آ ٹی وی چینل آک دا وخت آ بھاز مالی تنکی تا گواچی ءُ، ہرانا رِد اٹ حکومت ہندن ءُ پالیسی اس ٹہیفنگ اٹی ءِ ہرا میڈیا ادارہ و صحافی ہڑتوم آتیکن کمکار مرے۔ او دا عمل اٹی صحافتی برادری نا راہشونی ءِ المی گوندا۔ او پارے کہ الیکٹرانک و پرنٹ میڈیا راج نا بنداوی گرج ءُ و اوفتے شون تننگ حکومت و صحافی تا اسیجائی زمواری ءِ۔ او پارے کہ اگہ ڈیجیٹل میڈیا نا اہمیت اٹی پدریسہ ودکی مننگ اٹی ءِ ولے متکن آ میڈیا پلیٹ فارم آتے سوگو کننگ ہم المی ءِ۔ او مستی پارے کہ الیکٹرانک و پرنٹ میڈیا ٹی اینو ہم ادارتی بورڈ خبر آتا پک کننگ، آب و پیشکش اٹی اہم کڑد ادا کننگ اٹی ءُ، وخت اس کہ اخبار آتا پد ٹی وی چینل نا ادارتی نظام ہم صحافت نا آب ءِ برجا تخنگ اٹی اہم خذمت سر تسنے۔ عطاء اللہ تارڑ پارے کہ اینو نیوز اٹی ملازم آتا تنخواہ تا مفننگ نا باندات آ ہم ہیت مسنے و حکومت میڈیا ورکر آتے پیش بروک ویل آتا ایسری کن ہر وڑ انا کمک فراوان کننگک۔