بھارت سیاسی پروپیگنڈہ غاتیان راستیک بدل مننگ کپسہ،وزیر دفاع خواجہ آصف

وزیر دفاع خواجہ آصف جموں و کشمیر نا بابت بھارتی موقف ءِ مسترد کرسا پارینے کہ بھارت سیاسی پروپیگنڈہ و زور انا کمک اٹ جہانی کہول آ امنا مروک کانودی راستکی تے بدل کننگ کپک۔ بھارتی وزیر دفاع نا پوسکن آ بیانک بھاز غیرذمہ دارانہ ءُ۔ راجی رابطہ نا ویب سائٹ “ایکس” آ جاری تینا بیان اٹی خواجہ آصف پارے کہ بھارتی سرکڑدہ نا ورگڑیفوک آ بیانک جموں و کشمیر نا جھیڑہ ئی حیثیت ءِ بدل کننگ کپسہ۔ او پارے کہ جموں و کشمیر اسہ جہانی کہول آ امنا مروک جھیڑہ ئی علاقہ اسے و اونا آخبت نا فیصلہ اقوام متحدہ نا سلامتی کونسل نا قرارداد و کشمیری الس نا است خواہی نا رِد اٹ مننگ المی ءِ۔ وزیر دفاع پارے کہ پاکستان آ بھارت نا بے بنداو دوبہ غاک اونا جند انا ریکارڈ نا سوب آن پتی مننگ کپسہ۔ او پارے کہ بھارت سویلی ایشیا ٹی نزوری تالانی نا بنداوی سوب ءِ و اونا بیدادی و توسیع پسندانہ پالیسیک مچ آ ڈیہہ انا امن کن خطرہ جوڑ مننگ اٹی ءُ۔ خواجہ آصف خبڑدار کرے کہ بھارتی سرکڑدہ غاتا غیر زموارانہ بیان بازی ڈیہہ اٹی ریاست آتا نیام اٹی چک وتاڑ و جنگ انا خطرہ غاتیٹی ودکی نا سوب مننگ کیک۔ او پارے کہ پاکستان امن، مذاکرات و تین پہ تینی شرف انا پالیسی آ سلوک ءِ ولے تینا وتواجہی‘ علاقائی سالمیت و قومی سلامتی نا رکھ اکن اونا عزم نزور مفک۔ وزیر دفاع مستی پارے کہ بھارتی وزیر دفاع نا داسہ نا بیان آتا مسخت ملک اٹی ودک آ سیاسی تنکی و مودی حکومت نا برخلاف السی بے چیٹی آن چکار ءِ اسہ کنڈ کننگ ءِ۔