صحبت پور، مانجھوٹی واہ نا پننگ آن نوکاپی حالیت، السی کمک کن ہلہلہ ئی گام گیج

مانجھوٹی شاخ انا پننگ نا سوب آن نوکاپی دیر ترندی اٹ خڑک آبادی آتیٹی پترینگا، ہراڑآن کیہی خلق آک دیر انا جھل انا مون اٹ بسر و اُرا تے نسخان رسینگا۔ دیر اُرا تیٹی پترینگنگ نا سوب آن الس ءِ تینا نہادی گڑا و مال تے رکھی ہند آتیا گدریفنگ اٹی بھلو خواری اس مون تروئی تما، وخت اس کہ کیہی خاہوت آک تینا ہنکین آتے یلہ کرسا ہورک آ آسمان یا رکھی ہند آتا کنڈ آ ہننگ آ بیوس مسر۔ دا ہلہلہ ئی حالیت علاقہ نا ہڑدے ئی زند ءِ بھاز خراب زہمی کرے و زہمی آتے دمدستی کمک نا گرج ئس، حالیت نا سنگینی ءِ مون آ تخسا ڈپٹی کمشنر صحبت پور فریدہ ترین نا خاص آ پارت آ ضلعی انتظامیہ دمدستی وڑ اٹ ہلہلہ ؤ بنداو آ ریسکیو و ریلیف آپریشن نا بناءِ کرے۔ انتظامیہ، لیویز فورس و ایلو متعلقہ ادارہ غاتا ٹیم آک دمدستی وڑ اٹ زہمی علاقہ غاتیٹی سرمسر و الس ءِ رکھی ہند آتیا گدریفنگ نا عمل نا بناءِ کریر۔