حکومت ای کامرس و اے آئی نا جوان ءُ پالیسی پک دروشم تسنے، جام کمال

بنجائی وزیر واپار جام کمال خان تون میٹا نا ڈل اس اوڑدہی کرے۔ وزارت نا کنڈآن جاری بیان نا رداٹ اوڑدہی ٹی ڈیجیٹل زرگزران ، اے آئی و ای کامرس نا بشخ آتے ٹی کمکاری نا بابت گپ وتران کننگا۔ بنجائی وزیر واپار جام کمال خان میٹا ءِ پاکستان نا ڈیجیٹل زرگزران و مصنوعی ذہانت نا بشخ اٹی شریدار مننگ نا سلہ خلک۔ بنجائی وزیر اسہ ہزار پاکستانی ایس ایم ایز آتے اے آئی و ڈیجیٹل بزنس ٹریننگ تننگ نا میٹا نا پروگرام نا ستاءِ کرے۔ او پارے کہ حکومتِ پاکستان ای کامرس و اے آئی نا جوان پالیسی تے پک دروشم تسنے، پاکستانی واپار آتے جہانی مارکیٹ اسکان رسینگ کن آرٹیفیشل انٹیلی جنس و ڈیجیٹل پلیٹ فارم آتیان پبی فائدہ ہرفوئی مریک ۔ جام کمال خان پارے کہ وزارت واپار میٹا ءِ چیمبرز آف کامرس، واپاری تنظیم و کاروباری ایسوسی ایشن تون رابطہ غاتے ٹی ہر وڑ انا کمک فراوان کیک۔ میٹا پاکستان اٹی اسہ ہزار ایس ایم ایز آتے اے آئی ڈیجیٹل مارکیٹنگ و آن لائن کاروباری ہیلکاری نا مفت ٹریننگ فراوان کیک۔ جام کمال پارے کہ رکھوک ڈیجیٹل زرتس تا نظام ای کامرس نا مونی دننگ و خریدار آتا باوری کن المی ءِ، پاکستان نا ورنا آبادی و ترندی اٹ ودوک آ ڈیجیٹل زرگزران جہانی ٹیکنالوجی کمپنی تیکن گچین وارخواہی فراوان کیک ۔ او پارے کہ میٹا نا ایس ایم ای ٹریننگ پروگرام اگست آن نومبر اسکان برجاسلک ، ہراٹی زالبول کاروباری بندغ و چنکا شارتا واپار تے ہم خاص وڑٹ اوار کننگک۔