ژوب اٹی پر تیان زہمی علاقہ غاتیٹی کمکی سرجز آتیٹی ترندی اتنگے،کمشنر آصف علی فرخ

کمشنر ژوب ڈویژن آصف علی فرخ اسسٹنٹ کمشنر ژوب محمد نوید عالم تون اوار تورہ خولہ نا پِر تیان زہمی علاقہ غاتا دورہ ءِ کرے و داسہ نا بھلا پِر نوکاپ آن مروک نسخان تا جاچ ءِ ہلک۔ دورہ نا وخت آ کمشنر زہمی رابطہ کسر، آبگاہ، ڈور و ایلو بنداوی پنجر ءِ مروک نسخان تا جاچ ءِ ہلک و تعلقدار محکمہ خاص وڑ اٹ مواصلات و تعمیرات، پی ڈی ایم اے، ضلعی انتظامیہ و ایلو ادارہ غاتے پارت کرے کہ زہمی رابطہ سڑک آتا بحالی، ڈیمبری تا اینک کننگ و ہن وبر نا زُوت آن زُوت بحالی کن ہلہلہ ئی بنداو آ گام گیج کننگے تانکہ زہمی علاقہ غاتا الس ءِ پین خواری مون تروئی تمپ۔ کمشنر آصف علی فرخ پارے کہ حکومت بلوچستان پِر آن زہمی خاہوت آتا ہر وڑ انا کمک نا عزم کرینے و زہمی تا بحالی، ریلیف و بنداوی آسراتی تا فراوانی کن کل دوئی وسیلہ غاتے کاریم اٹ اتنگ انگ ءِ۔ او پیدوار کرے کہ اسہ زہمی خاہوت اسے ہم تنیا النگپک و کمکی سرجز آتا تینٹ چاروکی ءِ کننگ اٹ۔ داوخت آ کمشنر پِر آن زہمی خاہوت آتیٹی راشن، تمبو‘ کمبل و ایلو المی کمکی گڑاتے ہم بشخ و پانٹ کرے و تعلقدار کمامدار آتے پارت کرے کہ زہمی تے کنشت‘ سفا انگا دیر، طبی آسراتی و ایلو بنداوی گرج آتا فراوانی ی ہچ ڈیوالئی کننگپ۔ دورہ نا وخت آ کمشنر آصف علی فرخ پِر انا وخت آ پیش بروک است ہسون کروک شکست اٹی زوال مروک اِرا سال انا چنا نا خاہوت تون اوڑدہی کرے، خاہوت تون ہڑزخواہی کرے، او باور کرفے کہ ضلعی انتظامیہ زہمی خاہوت تون ہر وڑ انا کمک کیک۔ کمشنر تعلقدار ادارہ غاتے پارت کرے کہ ڈور تا پدریسہ چاروکی، پدتموک علاقہ غاتا حالیت نا جاچ و ہلہلہ ئی مشینری ءِ پورو وڑ اٹ فعال تخنگے تانکہ ہر وڑ انا گمانی ہلہلہ ئی حالیت اسے تون وخت آ مون تننگ مرے۔ او الس آن ہم خواست کرے کہ بھاز پِر انا وخت آ بے گرج سفر کپس و ڈور وجھل تیان مُر مریر و ضلعی انتظامیہ نا رکھی پارت آتیا عمل کیر۔ ژوب (میر محمود بلوچ)