سب تحصیل چاغی ءِ سب ڈویژن نا درجہ تننگ بھلو انقلابی ءُ فیصلہ اسے،قبائلی، راجی راہشون غلام جان درانی

قبائلی و راجی راہشون غلام جان درانی ایم پی اے چاغی و مسکوہی چیئرمین سینیٹ میر صادق خان سنجرانی و ورنا سیاسی لیڈر میر اعجاز خان سنجرانی نا کوشست آتا ستاءِ کرسا پارے کہ سب تحصیل چاغی ءِ سب ڈویژن نا درجہ تننگ چاغی نا تاریخ نا غٹ آن بھلا و انقلابی فیصلہ ءِ و دا فیصلہ پک کیک کہ ساڑی سرکڑدہ غاک الس نا دڑد ءِ تینا تکرہ و پد تموک علاقہ غاتے شونداری نا بنجائی دنگ اٹ اتنگ خوارہ۔ او پارے کہ سب ڈویژن مننگ آن چاغی نا الس نا دہائی تیان محرومیک مُر مریرہ و داسہ الس ءِ چنکا کاریم کن دالبندین، خاران، کوئٹہ یا ایلو ضلع غاتا خواری تے ہرفوئی تمپک۔ سب ڈویژن نا کہول آ ڈپٹی کمشنر نا دفتر، اسسٹنٹ کمشنر نا دفتر، سب ڈویژن ہیڈکوارٹر ہسپتال، سب ڈویژن کورٹ، ریونیو آفس، نادرا آفس، پاسپورٹ آفس و ایلو کل محکمہ غاک جوڑ مریرہ ہراڑان الس ءِ تینا درگہ غا انصاف، جانجوڑی، تعلیم و ایلو آسراتیک دوئی مریرہ۔ او مستی پارے کہ سب ڈویژن مننگ آن پد انتظامی واکداری تیٹی بھلو ودکی اس مریک و فیصلہ غاک داسہ ہندی کہول آ دمدستی مریرہ، صوبائی و بنجائی بجٹ اٹی چاغی نا بشخ دراست بریک و کسر تا جوڑ کننگ‘ سفا انگا دیر انا فراوانی، بجلی نا ڈٹ و تعلیمی ادارہ غاتا جوڑ کننگ کن فنڈ انا ہچ ءُ تنکی اس مفک۔ پوسکن آ سرکاری دفتر آتا ملنگ آن سد آ ورناتے ملازمت رسینگک و ٹھیکہ و شونداری کاریمک ہندی بندغ آتے ملرہ‘ ہراڑان غریبی ٹی کمتی بریک و زرگزرانی سرجز آک ودرہ۔ سب ڈویژن نا کہول آ پولیس نا کارندہ و ایلو سیکورٹی ادارہ غاتا ساڑی گری ودنگ آن امن و ایمنی نا حالیت جوان مریک و الس ءِ دمدستی انصاف رسینگک۔ سب ڈویژن ہیڈکوارٹر ہسپتال مننگ آن ناجوڑ آتے درمان کن مُر ہنوئی تمپک و گرلز و بوائز کالج آک اپ گریڈ مرسا یونیورسٹی کیمپس نا دروشم تینائی کیرہ۔ سب ڈویژن مننگ آن تحصیل چاغی نا پن صوبائی و قومی کہول آ پیدوار مریک و تحصیل چاغی نا معدنیات آن دوئی مروک آ فائدہ غاتا بھلا بشخ داسہ دراست چاغی نا الس آ خڑچ مریک۔ گڈسر اٹی غلام جان درانی میر صادق خان سنجرانی و میر اعجاز خان سنجرانی نا منتواری ءِ ہرفسا اومیت درشان کرے کہ سب ڈویژن مننگ آن پد سرکڑدہ غاک چاغی ءِ اسہ دروری سب ڈویژن جوڑ کننگ کن گام گیج کیرہ تانکہ بروک آ چین تا آخبت روشنا مرے و چاغی شونداری، شونہالی و امن نا ہند جوڑ مرے۔ چاغی (نامہ نگار)