خاران: واپڈا ہائیڈرو یونین نا ملازم آتا ویل آتا ایسری کن برانز

واپڈا ہائیڈرو یونین نا بنجائی و صوبائی سرکڑدہ غاتا کال آ ضلع خاران اٹی محکمہ واپڈا نا نجکاری، سیاسی نیام تمنگ و ملازم آتا کیہی ویل آتا برخلاف برانز کننگا، دا رد اٹ سب ڈویژن آفس خاران اٹی سرکل خضدار و خاران نا عہدیدار آتتون اوار واپڈا نا ملازم آک بھلو کچ اسے ٹی برانز اٹی بشخ ہلکر۔ برانزی مچی ٹی محکمہ ٹی مروک بیدادی تا برخلاف نعرہ خلنگا‘ برانزی مچی آن تران کرسا سرکل خضدار نا جوائنٹ سیکرٹری حاجی عبدالحئی، سب ڈویژن چیئرمین حاجی گل حسن ریکی، جنرل سیکرٹری میر جلیل احمد نوشیروانی، وائس چیئرمین بشیر احمد شاہ، حاجی محمد عارف چنال، مسکوہی وائس چیئرمین حاجی گل جان تون اوار راہشونک پاریر کہ واپڈا نا نجکاری، ودوک آ کبینی و فکسڈ تنخواہ غا بھرتی تا سخت مذمت ءِ کینہ۔ ترانکار آک پاریر کہ محکمہ ٹی سیاسی نیام تمنگ بھاز زیات مسنے‘ کارندہ غاتا بھاز کمتی آن پد ہم پوسکن آ بھرتی تیا رکھ خلنگ آن ساڑی ملازم آتیا کاریم نا باریم سگ آن پیش مسنے۔ او فیلڈ اسٹاف ءِ مون تروک بے رکھی نا ویل آتیا ہم ہیت کریر‘ راہشونک حکومت و تعلقدار کمامدار آتیان خواست کریر کہ ملازم آتا ویل آتے دمدستی وڑ اٹ ایسر کننگے نہ تو برانز نا دنگ ءِ پین ودفنگک۔ برانز نا وخت آ شریدار آک تینا خواست آتا حق اٹی نعرہ ہم خلکر۔ خاران (رپورٹ محمد عیسیٰ محمد حسنی)