وزیراعظم تون کینیڈین وزیر خارجہ نا اوڑدہی،پاکستان و کینیڈا نا کینولا درآمد تون اوار کیہی ایلو باندات آتیا معاہدہ

وزیر اعظم محمد شہباز شریف تون کینیڈا نا وزیر خارجہ انیتا آنند وزیر اعظم ہاؤس اٹی اوڑدہی کرے۔ اوڑدہی ٹی مہمان وزیر خارجہ پارے کہ درملکی زرکاری نا شون تننگ و رکھ انا معاہدہ پاکستان اٹی کینیڈین زرکار آتا پت ءِ ودفنگ و زرکاری ٹی ودکی کن اہم ءُ بنداو اس جوڑ مریک۔ ہڑتوم آ سرکڑدہ غاک دا ہیت آ ہم امنا کریر کہ کینیڈا ٹی ہندی پاکستانی راج ہڑتوم آ ملک آتا نیام اٹ اسہ سوگو ءُ پول اسے نا کڑد ءِ ادا کننگ اٹی ءِ۔ پاکستان ءِ کینولا نا درآمد نا بابت معاہدہ غا دستخط نا دود اڈ ہلک۔ انیتا آنند پاکستان نا سرکاری دورہ غا بسنے۔ دا اوڑدہی ٹی نائب وزیر اعظم و وزیر خارجہ سینیٹر محمد اسحاق ڈار، بنجائی وزیر برائے قومی غذائی رکھ و پٹ وپول رانا تنویر حسین، وزیراعظم نا سلاہکار ڈاکٹر سید توقیر شاہ و ایلو بڑزکو کہولی سرکاری کمامدار آک ہم ساڑی ئسر۔ گچین چاگڑد اٹی مروک دا اوڑدہی نا وخت آ وزیراعظم کینیڈین وزیر خارجہ ءِ پاکستان آ بننگ آ بخیر کرے و دا ہیت نا دوارگی ءِ کرے کہ ہڑتوم آ ملک آتا نیام اٹ سنگتی نا تعلقداریک ساڑی ءُ ہرافتیٹی خاص وڑ اٹ واپاری‘ زرکاری، کشت وکشار‘ ایگری فوڈز و ویکسین نا جوڑ کننگ‘ بدل گیگ توانائی، آٹو موبائل و آٹو پارٹ انا صنعت نا بشخ آتیٹی ودکی نا گنجائشت ءِ۔ وزیر اعظم کینیڈا نا وزیر اعظم مارک کارنی کن تینا نیک انگا استخواہی نا کلہو سر کرے و پارے کہ او اوڑتون زُوت اوڑدہی نا خواہندار ءِ‘ او اپریل اٹی تینا کینیڈین ہم منصب تون مروک ٹیلفون آ گپ و تران ءِ یات کرے و ڈیہہ اٹ امن نا کوشست آتیٹی پاکستان نا مخ تفی کننگ آ کینیڈا نا منتواری ءِ ہرفے۔ کینیڈا نا وزیر خارجہ انیتا آنند اسلام آباد اٹی تینا و تینا ڈل انا پبی بخیر کننگ آ وزیر اعظم نا منتواری ءِ ہرفے۔ او وزیر اعظم شہباز شریف ءِ کینیڈین وزیراعظم مارک کارنی نا نیک استخواہی تا کلہو ءِ سر کرے و پارے کہ اونا دا دورہ تینا وزیر اعظم نا پارت آ پاکستان تون تعلقداری تے ودفنگ کن ءِ۔