نیویارک نا میئر نیتن یاہو ءِ دزگیر کرفنگ نا بابت سجفنگ اٹی ءِ

نیویارک نا میئر ظہران مامدانی دا ہیت آ سجفنگ اٹی ءِ کہ اقوامِ متحدہ نا بروک آ بڑزکو کہولی دیوان نا وخت آ اسرائیلی وزیراعظم بنجمن نیتن یاہو ءِ دزگیر کننگ نا کوشست کننگک کہ آخا۔ میڈیا رپورٹ نا رِد اٹ مامدانی تدوک آدے اسہ انٹرویو اسے ٹی دا ہیت انا ذکر ءِ کرے ہراڑا نیتن یاہو نا کیمپ انا کنڈ آن بھلو غوغا اس کننگا۔ ظہران مامدانی نیویارک ٹائمز ءِ پارے کہ نیتن یاہو اسہ جنگی ڈوہدار اسے‘ ہراڑا جہانی فوجداری عدالت ڈوہ بیٹ کرینے۔ مامدانی، ہراکہ اسرائیل ءِ اسہ نسل پرست حکومت اس گوندک، مستی پارے کہ دا بیرہ کنا سلاہ اف بلکن بھاز آ بندغ آتا ہندا سلاہ ءِ و دانا سوب نیتن یاہو نا تدوک آ کیہی سال آتیٹی کروک آ گام گیج آک ءُ۔ مامدانی پارے کہ کنے پک سما اف کہ کن تون نیویارک پولیس ڈیپارٹمنٹ ءِ پیشن نا سرکڑدہ اسے دزگیر کننگ نا پارت کننگ نا واکداری ارے یا آخا ولے او شار انا کانودی ٹیم اتون دا باندات آ ہیت و گپ کننگ اٹی ءِ۔ او پارے کہ کانود کنے نیویارک شار اٹی ہرا کاریم نا موکل ایتک، نن ہمو کاریم ءِ کینہ۔