سیاسی و عسکری سروک آک دہشت گردی نا چٹفنگ کن سنبرینگوک ءُ، وزیراعظم شہباز شریف
امن نا بحالی و شونداری کن غٹ کاریم اٹ اتوک آ وسیلہ غاتے کاریم اٹ اتنگک، سکیورٹی فورس آک گچین کارروائی کرسا 54 دہشت گرد آتے دوزخی کریر، گڈیکو پھساتی دہشت گرد نا چٹفنگ اسکان جنگ برجا سلک
Get real time updates directly on you device, subscribe now.
وزیراعظم محمد شہباز شریف ملک آن دہشت گردی نا پورو چٹفنگ نا بدل مفروک ارادہ نا دوارگی کرسا پارینے کہ ملک انا سیاسی و عسکری سروک آک پورو چکار اٹ دہشت گردی نا چٹفنگ کن سنبرینگوک ءُ، گڈیکو پھساتی دہشت گرد نا چٹفنگ اسکان جنگ برجا سلک، حکومت غٹ دوئی وسیلہ غاتے کاریم اٹ اتسا پاکستان ءِ امن، شونداری و شونہالی نا کنڈآ دیک، دشمن پاکستان نا سفارتی سرسہبی و تدوک آ سال معرکہ حق اٹ دوئی مروک آ سرسہبی تیان ہبکہ ءِ۔ دا خیال آتا درشانی ءِ او پنچ شنبے نادے کوئٹہ ٹی صوبائی ایپکس کمیٹی نا دیوان آن تران کرسا کرے۔ دیوان اٹ چیف آف آرمی اسٹاف فیڈمارشل جنرل سید عاصم منیر، گورنر بلوچستان شیخ جعفر خان مندوخیل، وزیراعلیٰ بلوچستان میر سرفراز بگٹی، بنجائی وزیر حوالکاری عطاء اللہ تارڑ، بنجائی وزیر اقتصادی باندات احد خان چیمہ، وزیراعظم نا سلاہکار سیاسی باندات رانا ثنا اللہ و کانود نافذ کروک ادارہ غاتا سروک آک بشخ ہلکُر۔ دیوان آن تران کرسا وزیراعظم پارے کہ تدوک آ چار دے اٹی بلوچستان اٹ بھاز است ہسون دہشت گردی نا واقعہ غاک مسر، ہرافتے ٹی پولیس کارندہ، سیکورٹی فورس انا ورنا و بے گناہ شاریک شہید مسر۔ او پارے کہ سیکورٹی فورس آک گچین کارروائی کرسا 54 دہشت گرد آتے دوزخی کریر، دہشت گردی نا برخلاف جنگ ہمو وخت اسکان برجاء سلک ہراتم اسکان گڈیکو پھساتی دہشت گرد چٹفنگپ۔ شہباز شریف پارے کہ پاکستان نا فوج، کانود نافذ کروک ادارہ و مچ آ قوم دہشت گردی نا برخلاف بے مٹ قربانی تسنے۔ قوم تینا بہادر فوج و سیکورٹی ادارہ غاتون اوار سلوک ءِ و یخین تخک کہ دا قربانی تا نتیجہ ٹی دہشت گردی پورو چٹک۔ او پارے کہ داٹی ہچ ءُ شک اف کہ دہشت گردی نا دا فتنہ ٹی پاکستان نا دے ٹکی ہمسایہ ملک انا پبی دو ارے۔ ہرا دہشت گرد آتے سلہہ، مالی کمک و پین آسراتی تننگ ءِ۔ او پارے کہ اوغانستان نا ڈغار ءِ کاریم اٹ اتسا دہشت گرد آک خیبرپختونخوا و بلوچستان اٹ جلہو کیرہ، ولے ریاست دافتا ناپاک ارادہ غاتے امر کہ مرے بے سہب کیک۔ وزیراعظم پارے کہ ملک انا سیاسی و عسکری سروک آک پورو یکسوئی اٹ دہشت گردی نا چٹفنگ کن سنبرینگوک ءُ، دشمن پاکستان نا سفارتی سرسہبی و تدوک آ سال معرکہ حق اٹ دوئی مروک سرسہبی تیان خار اٹی ءِ‘ ہندا سوب آن او جتا جتا وڑ اٹ ملک اٹ نزوری ودی کننگ نا کوشست کننگ ءِ، ولے پاکستان نا سیاسی و عسکری سروک آک اسٹ ءُ و دہشت گردی نا چٹفنگ کن تینا عزم آ سلوک ءُ۔ او پارے کہ حکومت پاکستان، حکومت بلوچستان و پاکستان نا فوج دہشت گردی نا پورو چٹفنگ کن غٹ وسیلہ غاتے کاریم اٹ اتیرہ تانکہ ملک ءِ امن، سوگوی و شونداری نا ہند جوڑ کننگ مرے۔ وزیراعظم دہشت گردی نا واقعہ غاتیٹی شہید مروک آتے خراجِ عقیدت پیش کرسا پارے کہ اللہ تعالیٰ شہید آتا درجہ غاتے بڑز کے و جنت الفردوس اٹ جاگہ ایتے واوفتا خاہوت آتے صبرِ ایتے و ٹھپی تے زوت دراخ جوڑ کے۔ او پارے کہ شہید آتا قربانیک اسُل زیان مفسہ بلکن ہندا قربانیک پاکستان اٹ مدامگی امن نا بنداو جوڑ مریرہ۔