بلوچستان اپیکس کمیٹی نا دیوان دہشت گردی نا چٹفنگ کن بھلو پیشرفت اسے،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ وزیراعظم محمد شہباز شریف نا کماشی ٹی کوئٹہ ٹی اڈ ہلوک بلوچستان اپیکس کمیٹی نا دیوان دہشت گردی نا پورو چٹفنگ، مدامگی امن نا برجائی و بلوچستان نا روشنا آخبت کن فیصلہ کن ءُ گام اسے۔ دیوان اٹی قومی و صوبائی کہول آ سیاسی و عسکری سرکڑدہ غاک دہشت گردی نا برخلاف سوگو عزم انا درشانی ءِ کرسا دا ہیت آ امنا کریر کہ ریاست دشمن‘ اوفتا کمکار و پاکستان نا برخلاف کاریم کروک غٹ دہشت گرد نیٹ ورک آتے ہر نہاد آ شکست تننگک۔ وزیراعلیٰ پارے کہ بلوچستان اٹی امن و ایمنی نا برجائی حکومت نا اولیکو اولیت ءِ و دا مسخت نا دوئی کننگ کن بنجائی حکومت، صوبائی حکومت، پاک فوج، کانود نافذ کروک ادارہ و انٹیلی جنس ادارہ غاک پورو ہم گرنچی و یکسوئی اٹ کاریم کننگ اٹی ءُ۔ او پارے کہ دیوان اٹی امن و ایمنی نا جم حالیت، دہشت گردی تور نا سُج پام، انٹیلی جنس کوآرڈینیشن، سیمی سلامتی و دہشت گرد آتا برخلاف برجا کارروائی تا خوڑتی اٹ جاچ ءِ ہلنگا و کیہی اہم فیصلہ غاتے کننگا۔ میر سرفراز بگٹی پارے کہ وزیراعظم محمد شہباز شریف پیدوار کرینے کہ بلوچستان آن دہشت گردی و بے ایمنی نا پورو چٹفنگ کن ریاست تینا غٹ وسیلہ غاتے کاریم اٹ اتیک۔ دا عزم مچ آ قوم انا توار ءِ و ہراڑا عملدرآمد کن غٹ ریاستی ادارہ غاک اسٹ و سنبرینگوک ءُ۔ وزیراعلیٰ پارے کہ فیلڈ مارشل سید عاصم منیر نا کماشی ٹی پاک فوج دہشت گردی نا برخلاف جنگ اٹی گمان آن زیات کسبی لائخی، جیرت، قربانی و قومی عزم انا درشانی ءِ کرینے۔ او مستی پارے کہ سلہہ بند فوج مچ آ قوم انا گمر ءِ و اوفتا کسبی بود‘ قربانی و سرسہب کارروائی تا سوب آن دہشت گردی نا برخلاف جنگ اٹی نمان سرسہبی دوئی مسنے۔ پاک فوج، پولیس، لیویز، ایف سی و ایلو ادارہ غاتا کارندہ غاک تینا جان تے ندر کرسا وطن نا رکھ نا اسہ شانی ءُ تاریخ اس نوشتہ کرینو۔ شہید آتا قربانی مچ آ قوم انا میرات ءِ و ہندا قربانی تا سوب آن پاکستان نا امن، سوگوی و قومی سلامتی رکھوک دوتیٹی ءِ۔ وزیراعلیٰ بلوچستان پارے کہ دہشت گرد و اوفتا کمکار آک بلوچستان نا الس نا شونداری، شونہالی و قومی سیوت نا دشمن ءُ۔ دا وڑ انا بندغ آتے ہچ ءُ وڑ اسے ٹی بشخنگ مفک و ریاست پورو واکداری و کانود نا رِد اٹ اوفتا برخلاف کارروائی تے برجا تخک۔ بلوچستان نا پامدار الس مدام دہشت گردی و انتہا پسندی ءِ مسترد کرینے و بروک آ وخت اٹی ہم تینا سلہہ بند فوج و کانود نافذ کروک ادارہ غاتون ہم کوپہ سلوک مریک۔