صوبہ ٹی برجا شونداری ڈٹ آتا وخت آ پوروی و آب ءِ پک کننگے،سیکرٹری مواصلات و تعمیرات

سیکرٹری محکمہ مواصلات و تعمیرات بابر خان نا کماشی ٹی ڈپارٹمنٹل سب کمیٹی نا اسہ اہم ءُ دیوان اس اڈ ہلک ہراٹی ضلع پشین، ضلع برشور، ضلع قلعہ عبداللہ و کوئٹہ سٹی ٹی محکمہ نا سلاہ ئی شونداری ڈٹ آتا خوڑتی اٹ جاچ ءِ ہلنگا۔ یات سلے کہ وزیراعلیٰ بلوچستان میر سرفراز بگٹی نا وژن‘ صوبائی وزیر مواصلات و تعمیرات میر سلیم احمد کھوسہ نا خاص پارت و سیکرٹری مواصلات و تعمیرات بابر خان نا چاروکی ٹی ہڑدے ئی بنداو آ ڈی ایس سی نا دیوان اڈ ہلنگ ءِ تانکہ صوبہ ٹی دا اسکیم آتے دمدستی وڑاٹ بنا کننگے۔دیوان اٹی چیف انجینئر کوئٹہ زون عبدالرحیم بنگلزئی، ایس سی کوئٹہ سٹی اظہر جان، ایس سی پشین سرکل وسیم حیدر، ٹیکنیکل ایڈوائزر احسان اللہ خان دوتانی، پلاننگ اینڈ ڈویلپمنٹ (پی اینڈ ڈی) نا کمامدار و تعلقدار ایگزیکٹو انجینئر آک بشخ ہلکر۔ دیوان نا وخت آ دا ضلع غاتیٹی محکمہ مواصلات و تعمیرات نا رِد اٹ جتا جتا روڈ آتا شونداری ڈٹ آتیا خوڑتی اٹ سجفنگا۔ تعلقدار کمامدار آک ڈٹ آتا فزیبلٹی، خڑچ‘ تکنیکی پہلو و پورو مننگ نا گمانی وخت انا بابت جم بریفنگ تسر۔ دیوان اٹی دا ہیت آ زور شاغنگا کہ برجا شونداری ڈٹ آتے پک کروک وخت اٹ و بڑزکو آب اٹ پورو کننگے تانکہ الس ءِ جوان و رکھوک سفری آسراتی تا فراوانی پک مننگ کے۔ ڈپارٹمنٹل سب کمیٹی جتا جتا پوسکن آ روڈ پنجر نا ڈٹ آتیان بیدس روڈ آتا جوڑ کننگ و جوڑجاڑ تون گنڈوک کیہی اسکیم آتا منظوری نا سلاہ ءِ تس۔ دیوان اٹی فیصلہ کننگا کہ منظور مروک ڈٹ آتیا زُوت عملی کاریم نا بنا کن کل کانودی، انتظامی و تکنیکی خواست آتے وخت آ پورو کننگے۔ دا وخت آ سیکرٹری مواصلات و تعمیرات بابر خان تران کرسا پارے کہ شونداری ڈٹ آتیٹی پیدوار وڑاٹ کاریم، آب و وخت آ پورو مننگ ءِ امر کہ مرے پک کننگے۔ او تعلقدار افسر آتے پارت کرے کہ ڈٹ آتا چاروکی و مانیٹرنگ نا نظام ءِ پین بھرمی جوڑ کننگے و ہچ ءُ وڑ اسے نا ڈیوالئی یا رے تے ہچ سگنگ مفک۔