سینیٹ نا قائم مقام چیئرمین آغا خان یونیورسٹی ہسپتال آ بس، ڈاکٹر ماہ نور ناصر نا جان پُڑسی ءِ کرے

سینیٹ نا قائم مقام چیئرمین سیدال خان کراچی ٹی آغا خان یونیورسٹی ہسپتال نا دورہ ءِ کرے وتیزاب گردی نا است ہسون واقعہ ٹی ٹھپی مروک ڈاکٹر ماہ نور ناصر نا جان پڑسی ءِ کرے۔ سے شنبے نادے آ سینیٹ سیکرٹریٹ نا رداٹ سیدال خان ڈاکٹر ماہ نور ناصر و اونا خاہوت تون اوڑدہی کرے اوفتتون یکجہتی و ہمدردی نا درشانی ءِ کرے۔ او اونا زو ت دراخ جوڑی کن نیک انگا استخواہی نا درشانی ءِ کرے۔ او خاہوت ءِ باور کرفے کہ دا سخت انگا ساہت اٹ مچ آ قوم اوفتتون سلوک ءِ۔ سیدال خان زالبول آتا برخلاف ہر وڑ انا بیداد‘ خاص وڑ اٹ تیزاب گردی کون آ گندہ انگا ڈوہ تا سخت مذمت ءِ کرے۔ او پارے کہ دا وڑ انا بیدادی کاریمک مہذب راج اٹی ہچ امنا کننگ مفک و دا انسانی شرف و بنداوی حق آتا بھلو خلاف ورزی اسے۔ او است بڈی و یکجہتی نا درشانی نا وڑاٹ ڈاکٹر ماہ نور ناصر ءِ پھل آتا گلدستہ و ٹیکی تس۔ سینیٹ نا قائم مقام چیئرمین ڈاکٹر ماہ نور ناصر نا ہمت، استقامت و عزم انا ستاءِ کرسا پارے کہ او دا آزمائشت اٹی تنیا اف بلکن مچ آ قوم اوڑتون سلوک ءِ۔ سیدال خان ڈاکٹر ماہ نور ناصر آ مروک جلہو ءِ بھاز است ہسون و ِمذمت نا قابل گوندا۔ او کانود نافذ کروک ادارہ و صوبائی حکومت نا کوشست آتا ستاءِ کرسا پارے کہ جلہو کروک آ تینا ایسر آ سر مسنے و زہمی خاہوت ءِ انصاف رسینگانے۔ او دا ہیت آ زور شاغا کہ دا وڑ انا ڈوہ تا توننگ کن پدریسہ سنبرینگوک مننگ و کانود آ پبی عملدرآمد المی ءِ۔ سیدال خان ہسپتال انتظامیہ غان ڈاکٹر ماہ نور ناصر نا جان جوڑی و درمان نا بابت سرجمی اٹ حوال ہم ہلک۔ او ہسپتال نا طبی کارندہ غاتا کسبی چاہنداری و آب اٹ طبی آسراتی تا فراوانی نا ستاءِ ہم کرے۔ سیدال خان ڈاکٹر ماہ نور ناصر نا زوت و پورو جان جوڑی کن دعا کرے۔ او دا عزم انا درشانی ءِ کرے کہ مچ آ قوم دا سخت انگا ساہت اٹی اونا و اونا خاہوت تون سلوک ءِ۔