ایس ایم ای نا کسر نا اڑاند آتے مُر کننگ کن ہلہلہ ئی گام گیج المی ءِ،وزیراعظم محمد شہباز شریف

وزیراعظم محمد شہباز شریف ملکی برآمدآتیٹی ودکی کن چنکا و نیامی درجہ نا صنعت آتے (ایس ایم ایز) وام تا فراوانی ٹی آسانی ودی کننگ نا پارت کرسا پارینے کہ ایس ایم ایز نا شونداری نا کسر اٹ بروک اڑاند آتے مرکننگ کن ہلہلہ ئی بنداو تیا گام گیج المی ءِ، سمیڈا ورنا و ویمن انٹرپرینیور آتے چنکا و نیامی درجہ نا صنعت خلنگ اٹ کمک فراوان کے۔ وزیراعظم آفس نا میڈیا ونگ انا کنڈآن جاری بیان نا رداٹ دا خیال آتا درشانی او سے شنبے نا دے سمیڈا نا بابت دیوان آن تران کرسا کرے۔ دیوان اٹی نائب وزیراعظم و وزیر خارجہ سینیٹر محمد اسحاق ڈار، بنجائی وزیر ڈاکٹر مصدق ملک، خصوصی کمکار ہارون اختر و تعلقدار بڑزکو کمامدارآک بشخ ہلکر وخت اس کہ ہر چار آ صوبہ غاتا چیف سیکرٹریک و بشخ انا چاہندار آک ہم ویڈیو لنک انا کمک اٹ دیوان اٹی بشخ ہلکر۔ دیوان اٹی سمیڈا نا کنڈآن ایس ایم ایز نا آسانی کن گڑاس گام گیج آتیا حوال تننگا۔ وزیراعظم پارت کرے کہ ایس ایم ایز نا صنعت آتا کاریم نا کچ ءِ ودفنگ خاص وڑ اٹ بزغر آتا اجناس و میوہ غاتا پراسیسنگ کن اوفتے آگاہی و وام فراوان کننگ نا بابت آسانی تننگے، کمرشل بینک آتا چنکا و نیامی درجہ نا صنعت آتے وام تا فراوانی نا بابت خصوصی پراڈکٹ آتا تیاری نا است بڈی ءِ کننگے، چنکا و نیامی درجہ نا صنعت آتے فزیبلٹی نا تیاری و ایلو ریسہ غاتیٹی کمک فراوان کننگے۔ وزیراعظم پارے کہ ایس ایم ایز نا شونداری نا کسر اٹ بروک اڑاند آتے مر کننگ کن ہلہلہ ئی بنداو تیا گام گیج المی ءِ، سمیڈا ورنا ویمن انٹرپرینیورآتے چنکا و نیامی درجہ نا صنعت خلنگ اٹ کمک فراوان کے۔ وزیراعظم ایس ایم ایز نا وام تسکان رسینگ کن اسٹیٹ بینک و کمرشل بینک آتون اواری اٹ اسہ جوان ءُ لائحہ عمل اس جوڑ کننگ نا پارت ہم کرے۔ دیوان اٹی پاننگا کہ پاکستانی ایس ایم ایز نا جہانی منڈی تیا رسینگ و برآمد آتے ودفنگ کن برجاسال 700 ایس ایم ایز نا 16 ایونٹ اٹی بشخ ہلنگ ءِ پک کننگا، داڑتون اواراوار 35 شار تیٹی ایس ایم ایز آتے مالی ضابطہ و کاروبار نا بابت ٹریننگ تننگا۔ دیوان اٹی سمیڈا نا رداٹ چندی گام گیج آتے ہم مون آ تخنگا۔