چنا تا شخصیت و آخبت اٹ لمہ باوہ نا خمب بھلو کڑد اس ادا کیرہ،ڈاکٹر محمد نعیم زرکون

ڈائریکٹر نیوٹریشن پروگرام ڈاکٹر محمد نعیم زرکون نا خصوصی پارت آتا رِد اٹ و یونیسیف (UNICEF) بلوچستان نا کمک اٹ‘ بلوچستان نیوٹریشن ڈائریکٹوریٹ نا کنڈآن دالبندین (چاغی) ٹی “لمہ باوہ نا تُو (پیرنٹنگ منتھ) 2026ء” نا رِد اٹ اسہ دے ئی آگاہی سیمینار و واک اسے نا بست و بند کننگا۔ دا السی مہم نا بنداوی مسخت چناتا گچین ردوم، بریبر کنشت ذہنی نشوونما و جانجوڑ آخبت ءِ پک کننگ کن لمہ باوہ غاتیٹی شعور بیدار کننگ ئس۔ سیمینار اٹی جہانی کلہو “Protect Play, Protect Childhood” (گوازی و چنکی نا رکھ) ءِ مون آ اتسا دا ہیت آ زور شاغنگا کہ چناتا شخصیت و آخبت لمہ باوہ نا خمب اٹی جوڑ مریک‘ دا دود اٹی لمہ باوہ، علاقہ نا متبر‘ طبی و غذائی چاہندار، سول سوسائٹی نا باسک، میڈیا، استاد و بینظیر سپورٹ پروگرام (BISP) نا بے نظیر نشوونما پروگرام سینٹر آتا اسٹاف تون اوار غٹ اسٹیک ہولڈرآک بھلو کچ اسے ٹی بشخ ہلکر۔ سیمینار آن تران کرسا ڈسٹرکٹ نیوٹریشن کوآرڈینیٹر خلیفہ عبدالباسط ایجبانی، آر ایچ سی چاغی انچارج ڈاکٹر عبدالباسط زہری، او ٹی پی انچارج محمد آصف حسنی، پیرامیڈیکل ڈسٹرکٹ چاغی نا ضلعی چیئرمین شعیب احمد محمدحسنی، بے نظیر نشوونما نا ایف سی کوآرڈینیٹر میڈم نبیلہ، سی ایم ڈبلیو مس وحیدہ، میڈیم شکیلہ، میڈیم دردانہ ناصر، غذائی چاہندار ڈاکٹر نجم الدین سنجرانی، علاقائی متبر ملک خانجہان محمدحسنی، زبیر بڑیچ، شریف خان سنجرانی و ایلو طبی چاہندار آک چناتا بنائی زند انا ہزار دے انا اہمیت آ جم ہیت کریر۔ چاہندار آک پاریر کہ لمہ نا حمل آن ہلیس چنا نا اِرا سال انا وئی اسکان نا وخت چنا نا زند اکن غٹ آن اہم انگا دور ءِ، انتئے کہ انسانی دماغ نا ہچ 80 درسد بشخ ہندا دور اٹی ردوم خنک۔ اوفک مستی پاریر کہ لمہ غاتا گچین کنشت، پوسکن ودی مروک چناکن لمہ نا پال‘ وخت آ طبی جاچ و رکھوک ٹِک آک چناتے مدامگی نیم جانی و غذائی تنکی آن رکھوک تخرہ۔ ترانکار آک لمہ باوہ غاتیا زور شاغار کہ او چناتتون گوازی کیر، اوفتے کِسہ بنفر و مثبت گپ و تران نا کمک اٹ اوفتا ذہنی و جونی واکداری کچ ءِ ودفر۔ صوبہ ٹی غذائی کاختی نا چٹفنگ کن حکومتی گام گیج آتا ہیت ءِ کرسا ترانکار آک پاریر کہ بلوچستان نیوٹریشن ڈائریکٹوریٹ نا کماشی ٹی بھاز و نیامئی غذائی کاختی نا گواچی چنا و لمہ غاتا کمک کن او ٹی پی (OTP) و ٹی ایس ایف پی (TSFP) سینٹر آتا نیٹ ورک سرسہبی اٹ برجاءِ۔ دا رِد اٹ ضلع چاغی ٹی بھاز غذائی کاختی نا گواچی چناتا مفت درمان، تشخیص و غذائی دارو تا فراوانی کن 6 آؤٹ پیشنٹ تھیراپیوٹک پروگرام (OTP) سینٹر پورو وڑاٹ کاریم کننگ اٹی ءُ۔ دا ہند آتیٹی ڈی ایچ او چاغی ڈاکٹر عبدالمالک بلوچ، ڈسٹرکٹ منیجر پی پی ایچ آئی (PPHI) عبدالوہاب بلوچ و ڈسٹرکٹ نیوٹریشن کوآرڈینیٹر خلیفہ عبدالباسط ایجبانی نا چاروکی ٹی چناتا باقاعدگی اٹ اسکریننگ کننگ انگ ءِ۔ دود انا اخیر اٹ خلیفہ عبدالباسط ایجبانی غٹ شریدار آتا منتواری ءِ ہرفے و دا عزم انا درشانی ءِ کرے کہ چاغی نا اسہ چنا اس غذائی کاختی، مہر، تعلیم و رکھوک چنکی آن محروم سلپک۔ ترانکار آک میڈیا‘السی متبر و سول سوسائٹی آن خواست کریر کہ او چناتا جوانی کن دا کلہو ءِ ہر اُرا اسکان سر کننگ اٹی تینا کڑد ءِ ادا کیر۔چاغی (نامہ نگار)