دہشتگردی نا واقعہ غاتیان پد پاکستان نا پکتیا، پکتیکا و کنڑ اٹی کارروائی،29 خوارج خلنگار

آپریشن غضب للحق نا رداٹ سیکورٹی فورس آک پکتیا، پکتیکا و کنڑ اٹی جماعت الاحرار و فتنۃ الخوارج دہشت گرد کیمپ و رکھوک ہند آتے بھاز گچین وڑ اٹ شست کریر۔ بنجائی وزیر حوالکاری و شینکاری عطاء اللہ تارڑ دوشنبے نادے آ راجی رابطہ نا پلیٹ فارم ”ایکس“ آ تینا پوسٹ اٹی پارے کہ دا کارروائی ٹی دہشت گرد آتے زوال وخت اس کہ اوفتا سلہہ و گولہ بارود آتا کوڑی تے بھس کننگا۔ بنجائی وزیر حوالکاری پارے کہ دا کارروائی 29 جون نا نن کننگا۔ ہرافتیٹی جم وڑ اٹ 29 خوارج خلنگانو۔ دا رد اٹ پاکستان اوغان ناظم الامور ءِ وزارت خارجہ غا بٹنگسا کراچی ٹی دہشت گرد جلہو آ سخت برانزی چٹھی اس اونا دُوٹی تسنے وخت اس کہ ہندا وڑ انا اسہ برانزی چٹھی اس پاکستان نا سفیر عبیدالرحمان نظامانی اوغان وزارت خارجہ غا ہم سرکرینے۔ وزارت خارجہ نا ترجمان طاہر حسین اندرابی دوشنبے نادے آمیڈیا نا سوج آتا ورندی ٹی پارے کہ پاکستان کراچی جلہو اٹی اوغان شاری، ہرافتیان اسٹ ءِ زندہ دزگیر ہم کننگا، نا اوار مننگ آ اوغانستان نا طالبان حکومت ءِ برانزی چٹھی اس مون تسنے۔ طاہر حسین اندرابی پارے کہ تدوک آ نن اوغان ناظم الامور ءِ وزارت خارجہ غا بٹنگا و کراچی دہشت گرد جلہو آ اسہ سخت برانزی مراسلہ (ڈیمارش) اس اونا دُوٹی تننگا۔ ہندا وڑ انا اسہ برانزی چٹھی اس پاکستان نا سفیر عبیدالرحمان نظامانی اوغان وزارت خارجہ غاہم سرکرے۔ ترجمان پارے کہ دا ڈیمارش دا راستی نا بنداو آ جاری کننگاکہ دا جلہو اٹی اوغان شاریک اوار ئسر، ہرافتیان اسٹ اسے زندہ دزگیر ہم کننگا۔ داڑان اسہ وار ولدا پک مریک کہ اوغان ڈغار ءِ پاکستان نا تہہ ٹی دہشت گرد جلہو آتا ڈٹ بندی و اوفتیا عملدرآمد کن کاریم اٹ اتنگ انگ ءِ۔ ہندن صدر مملکت نا ترجمان مرتضیٰ سولنگی پارینے کہ کانود آن چَپ اوغان طالبان رجیم پاکستان نا جہانی امن نا وڑ ءِ نسخان تننگ کن تینا ڈغار آن دہشت گرد آتے ننا شاری و بہادر فوجی تیا جلہو آتیکن گدریفنگ ءِ تانکہ مودی و نیتن یاہو ءِ خوش کننگ مرے۔ دوشنبے نادے آایکس آ تینا بیان اٹی مرتضیٰ سولنگی پارے کہ شاید او تکرہ کہ پاکستان چُپ سلک یا اوفتا سروک اوفتے بچفک، پاکستان نئے بیرہ دہشت گردآتے اوفتا ایسر دوزخ اسکان سرکیک بلکن اوفتا کاٹم خواجہی و مالی کمک کروک آتے ہم ایسر اسکان سر کیک۔ صدر مملکت نا ترجمان پارے کہ نن دہشت گردی ءِ شکست ایتنہ و اوڑتون اوار دنیا نا امن ساز نا وڑاٹ تینا کڑد ءِ ہم برجا تخنہ۔