ریاست بے کنڈ ہلوک مننگ کپک، پیدوار ءُ نظریہ اس المی ءِ،و زیرا عظم

اسلام آباد :  وزیراعظم پارینے کہ پاکستان نا حقی واکداری، وسیلہ و لائخی تے کاریم اٹ اتنگ کن اوفتے شکست تننگ المی ءِ۔ وزیراعظم تینا نوشتانک اٹی راج انا اخلاقی تعمیر ءِ مخلوق آ اِلنگ و ریاست نا نیکی و بدی نا تصور آتا بارواٹ بے کنڈ ہلنگ مننگ نا خیال ءِ فرسودہ گوندسا پارینے کہ داتصور ریاست ءِ تینا اخلاقی زمواری ءِ پورو کننگ آن تورک و دانا مخالف آتے پاش آن پاش ءُ وارخواہی اس فراوان کیک کہ او ننا تعلیمی نظام و معلومداری نا وڑ تے کاریم اٹ اتسا تینا بے پناہ وسیلہ غاتا کمک اٹ ننا قدر ءِ برباد کیر۔ وزیراعظم پارے کہ قومی رحمت اللعالمین اتھارٹی اسکول و جامعہ غاتیٹی سیرت النبی صلی اللہ علیہ و آلہ وسلم نا تعلیم نا کمک اٹ امربالمعروف نا زمواری ءِ ادا کننگ کن سنبرینگوک ءِ، داڑآن ننا راج انا اخلاقی آب بڑزمریک۔ وزیراعظم ریاست مدینہ نا آسودہی ریاست نا تصور ءِ تالان کرسا پارے کہ ریاست مدینہ تاریخ انسانی نا اولیکو ریاست ءِ ہراٹی نزور تپہ نا زمواری ءِ ہرفنگا، ننے ہم نبی کریم صلی اللہ علیہ و آلہ وسلم نا داسنت آ عمل کروئی مریک، نن کچ اٹنگا وسیلہ غاتیان پد ہم احساس پروگرام کون آ گام گیج آتیکن ہنداخہ وسیلہ جتا کرینن ہراخس مہالو اسُل کننگتنے، جان جوڑی آسودہی پروگرام پاکستانی تاریخ نا عظیم ڈٹ آتیان اسٹ ءِ ہراشاری تیکن یونیورسل ہیلتھ انا آسراتی فراوان کیک، دا ڈٹ نیزگاری ٹی تموک ہمونزور شاری تا رکھ ءِ کیک ہرادرمان کن وام ہلنگ آ بیوس ءُ، داڑآن مچ آ ملک اٹی نجی ہسپتال آتا اسہ نیٹ ورک اس ہم وجود اٹ بریک، پنجاب حکومت دا ڈٹ اکن 400 ارب روپئی جتا کرینے۔ وزیراعظم تینا حکومت نا کنڈآن احساس سکالرشپ پروگرام نا ہم ذکر ءِ کرے و پارے کہ دا پروگرام نا رداٹ 6 ملین وظیفہ تننگ انگ ءِ ہرافتا مالیت 47 ارب روپئی ءِ، پاکستان نا تاریخ اٹ تعلیم نا بشخ اٹی دانا ہچ ءُ درور اس ملپک۔

(اے پی پی)