وزیراعظم روسی صدر نا کنڈ آن توہین رسالت نا بابت بیان آ منتوار

اسلام آباد: وزیراعظم عمران خان روسی صدر ولادی میر پیوٹن تون ٹیلفون آ حالی حوالی مسنے، دا وخت آ تین پہ تینی کمک تون اوار تین پہ تینی است خواہی نا باندات ہیت و گپ کننگا و تدوک آ سال مروک ہیت و گپ انا ستا ءِ ہم کننگا۔ سرجم حوال آتا رد اٹ وزیراعظم عمران خان ٹیلفون آ ہیت و گپ اٹی توہین رسالت نا برخلاف صدر پیوٹن نا بیان نا ستا ءِ کرے و پارے کہ روس اتون تین پہ تینی خڑکی تا گچینی نا کنڈ آ گام کننگ ءِ۔ واپاری و اقتصادی تعلقداری، توانائی نا بشخ اٹی کمک آ چکار تون گنڈوک ءِ۔ ہیت و گپ نا وخت آ پاک روس گیس پائپ لائن ڈٹ انا زپو پوروی نا عزم انا درشانی ہم کننگا۔ عمران خان پارے کہ پر امن اوغانستان علاقائی سوگوی کن اہم ءِ۔ اوغانستان ءِ بھلو انسانی و زرگزرانی چیلنج اس مون تروک ءِ۔ اوغان الس کن جہانی برادری نا مخ تفی بھاز اہم ءِ۔ وزیراعظم اوغانستان نا مالیاتی میرات آتا جاری کننگ نا اہمیت آ زور شاغا، وخت اس کہ دا وخت آ ہڑتوم آ راہشونک اسہ ایلو ءِ تینا ملک آ بننگ نا سلہ خلکر۔

(آن لائن)