کوئٹہ، سریاب روڈ آ دھماکہ، پولیس کارندہ اس شہید، 16 بندغ ٹھپی

کوئٹہ (مانیٹرنگ ڈیسک/ خ ن)کوئٹہ نا علاقہ سریاب روڈ آ دھماکہ اسے ٹی اسہ پولیس کارندہ اس شہید، وخت اس کہ 13 پولیس کارندہ غاتتون اوار 16 بندغ ٹھپی مسنو۔ ترجمان محکمہ انسداد دہشتگردی (سی ٹی ڈی) نا رد اٹ سریاب روڈ آ بلوچستان یونیورسٹی نا خڑک آ مروک دھماکہ ٹی اسہ پولیس کارندہ اس زوال مسنے۔ 13پولیس کارندہ و3 کسری ٹھپی مسنو۔ کل ٹھپی، پولیس کارندہ و مسہ کسری ءِ سول ہسپتال آ گدریفنگانے۔ پولیس نا پاننگ ءِ کہ دھماکہ نا کمک اٹ پولیس نا گاڈی ءِ شست کننگا۔ دھماکہ موٹر سائیکل اسے ٹی تخوک ڈیوائس نا کمک اٹ کننگا۔ وزیراعلیٰ بلوچستان سریاب روڈ دھماکہ نا رپورٹ ءِ بٹنگانے، و جاست پاست نا پرمان کرینے۔ وزیراعلیٰ دھماکہ ٹی پولیس کارندہ نا شہادت و ٹھپی بندغ آتے کن ڈکھیائی نا درشانی کرے و پارے کہ تخریب کار آک صوبہ نا امن ءِ بھس کننگ خواہسرہ، دہشت گرد آتے مذموم مسخت اٹ سرسہب مننگ کن الیپنہ۔ داکان بیدس صوبائی وزیر داخلہ میر ضیاء اللہ لانگو کوئٹہ بلوچستان یونیورسٹی پولیس ٹرک آ بمب دھماکہ نا ترند انگا لوز آتیٹی مذمت ءِ کرسا شہید مروک آ سیکورٹی کارندہ ءِ خراج عقیدت پیش کرینے۔ او پارے کہ دھماکہ ٹی اسہ کارندہ اس شہید و ہفت کارندہ ٹھپی مسنو۔ سیکورٹی کارندہ غاک بی ایس او نا سیکورٹی آ سلوک ئسرہ۔ ہرافک یونیورسٹی نا مون آ دھرنا تسوسر۔ شہید سکیورٹی کارندہ نا خاہوت کن ارمانی اُن۔ او پارے کہ شہید کارندہ وطن عزیز کن و امن کن تینے ندر کرے۔ ننا کل ہمدردیک اونا تینائی تتون اریر۔ وزیر داخلہ ٹھپی کارندہ غاتا زُو جاندراخی کن دعا کرے۔ و پارے کہ ڈکھیا خاہوت آتا دڑد اٹ بریبر نا شریدار اُن۔