پی پی چینی نائب وزیراعظم ءِ جم وجوش اٹ بخیر کیک، شیری رحمن

اسلام آباد :  بنجائی وزیر موسمیاتی بدلی و چاگڑدی رابطہ سینیٹر شیری رحمان پارینے کہ پاکستان پیپلزپارٹی چین پاکستان اقتصادی راہداری ڈٹ (سی پیک) نا 10 می سال دے انا دود آتیٹی بشخ ہلنگ کن بروک آ چین نا نائب وزیراعظم ہی لی فینگ ءِ جم جوش اٹ بخیر کیک۔ دوشنبے نادے آ تینا ٹویٹ اٹی اوپارے کہ ننے پاکستان و چین نا نیام اٹ پائیدار سنگتی آ گمر ءِ ہرانا بنداو شہید ذوالفقار علی بھٹو و چیئرمین ماؤزے تنگ تخار، ننکن سی پیک اسہ گمرنا قابل ءُ ڈٹ اسے ہرانا سہرا صدر شی جن پنگ و آصف علی رداری کن کاہک۔ اوپارے کہ صدارت نا عہدہ ءِ سنبھالنگ آن پد آصف علی زرداری تینا اولیکو سفارتی دورہ ءِ چین نا کرے تانکہ شہید ذوالفقار علی بھٹو و شہید بے نظیر بھٹو نا جوڑ کروک آ ہڑتوم آ کنڈآتا تعلقداری تے پین سوگو کننگ مرے، اواولیکو سال اٹی چار وار چین نا دورہ ءِ کرے۔ آصف علی زرداری بطور صدر تینا دور اٹی کیہی وار چین نا دورہ ءِ کرے و صدارت ءِ اِلنگ آن پد ہم او بلاول بھٹو زرداری تون اوار سی پیک نا پیش رفت ءِ ودفنگ کن چین نا دورہ ءِ کرے، ہندا سوب ءِ چین نا حکومت اوفتے سی پیک نا بانی گوندا۔ دا تاریخ ساز ڈٹ ننا ہڑتوم آ کنڈآتا تعلقداری تے سوگو کننگ اٹ اسہ اہم ءُ مزل نا نشان اس مسنے۔ اوپارے کہ مسکوہی نابود حکومت نا سوب آن سی پیک سست روی نا گواچی مس ولے نن دا گیم چینجر ڈٹ ءِ ترندی اٹ مون آ دننگ نا خواہندار اُن۔ اوتینا ٹویٹ اٹی پاک چین سنگتی زندہ باد نا نعرہ ءِ ہم نوشتہ کرے۔

(اے پی پی)