پاکستان و چین انا کل باندات آتیا اسہ ایلو نا مخ تفی نا عزم
چینی نائب وزیر اعظم نا کنڈ آن پاکستان نا زرگزرانی، اقتصادی شونداری و شونہالی ٹی کمک ءِ برجا تخنگ نا باور کرفنگا، ہڑتوم آ ملک آتا نیام اٹ مفاہمتی یات داشت آتیا دستخط کننگا،اعلامیہ
Get real time updates directly on you device, subscribe now.
اسلام آباد : پاکستان وچین علاقائی ویل و قومی فائدہ غاتیااسہ ایلو نا مخ تفی نا عزم انادرشانی کرینو‘ وزیراعظم شہبازشریف پارینے کہ پاک چین اقتصادی راہداری ڈٹ انا دہمیکوسال دے دا ڈٹ ءِ اولسر ودفنگ نا بھاز جوانی ءُ وارخواہی اسے‘ وخت اس کہ چینی نائب وزیراعظم ہی لیفینگ پاکستان نا زرگزرانی و اقتصادی شونداری وشونہالی ٹی چین نا آخبتی کمک نا باور کرفینے۔ وزیر اعظم ہاؤس آن وزیراعظم شہباز شریف و چینی نائب وزیراعظم نا اوڑدہی نا اعلامیہ جاری کننگا‘ اعلامیہ ٹی پاننگانے کہ وزیراعظم شہباز شریف تون چینی صدر شی جن پنگ نا خصوصی نمائندہ، چین نا نائب وزیراعظم و کمیونسٹ پارٹی آف چائنا نا سینٹرل کمیٹی نا پولٹ بیورو نا باسک ہی لیفینگ اوڑدہی کرینے‘ وزیراعظم شہباز شریف چین نا نائب وزیراعظم ہی لیفینگ ءِ وزیراعظم ہاؤس آ سرمننگ آ جم وجوش اٹ بخیر کرے‘ اوڑدہی ناوخت آ پڑک آک پاکستان و چین نا تعلقداری نا چندی پہلو‘ چین پاکستان اقتصادی راہداری (CPEC) و اسہ ایلو نا اقتصادی و مالیاتی کمک آ گپ وتران کریر‘ وزیراعظم ہیلیفینگ ءِ مارچ اٹ چین نا نائب وزیراعظم ناعہدہ غا بننگ آ مبارکبادی تس‘ اعلامیہ نا رد اٹ وزیراعظم شہباز شریف اوڑدہی نا وخت آہیت وگپ کرسا پارے کہ چین پاکستان اٹ 2022 نا بھس کروک نوکاپ و پاکستان ءِ مون تروک ساڑی زرگزرانی چیلنج خاص وڑ اٹ آئی ایم ایف تون معاہدہ ءِ گڈیکو دروشم تننگ کون آ سختی ناوخت اٹ پاکستان تون کمک کرے۔ پاکستان و چین نا نیام اٹ مفاہمتی یات داشت آتیا دستخط نا دود اس وزیراعظم ہاؤس اٹی اڈ ہلک۔ دود اٹی وزیراعظم محمد شہباز شریف و چین نا نائب وزیراعظم ہی لی فینگ ئسک ہم خصوصی بشخ ہلکر۔ داوخت آ وزیرخارجہ بلاول بھٹو زرداری، بنجائی وزیر حوالکاری و شینکاری مریم اورنگزیب، بنجائی وزیر ڈٹ بندی، شونداری و خصوصی گام گیج پروفیسر احسن اقبال، بنجائی وزیر واپار سید نوید قمر، بنجائی وزیر سینیٹر محمد اسحاق ڈار، بنجائی وزیر داخلہ رانا ثناء اللہ خان، بنجائی وزیر ہوابازی و ریلوائی خواجہ سعد رفیق، بنجائی وزیر غذائی رکھ طارق بشیر چیمہ و وزیراعظم نا خصوصی کمکار طارق فاطمی آن بیدس چینی ڈل انا باسک آک ہم ساڑی ئسر۔ وزیراعظم محمد شہباز شریف چین نا نائب وزیراعظم ہی لی فینگ ءِ وزیراعظم ہاؤس آ بننگ آ بخیر کرے۔ اوکان پد وزیراعظم محمد شہباز شریف پاکستان نا مسہ دے ئی دورہ غا بروک آ شرفمند آ مہمان تون کابینہ نا باسک آتا اسٹ اسٹ آ درستی راستی ءِ کرفے۔ داوخت آ چین نا نائب وزیراعظم، وزیراعظم محمد شہباز شریف تون چینی ڈل انا باسک آتا درستی راستی ءِ ہم کرفے۔ ہڑتوم آ راہشونک تینا اوڑدہی ہم کریر، و اوتم اوفک تین پہ تینی تعلقداری نا مون آ دننگ و سوگوی نا رداٹ گپ وتران ہم کریر۔
(آن لائن)