تعلیمی آب ءِ گچین کننگ کن گام گیج نا گرج ءِ، گورنر بلوچستان

کوئٹہ : گورنر بلوچستان ملک عبدالولی خان کاکڑ پارینے کہ ننے خوانندگی ءِ ودفنگ تون اوار اوار تعلیمی آب ءِ بڑز کننگ کن گام گیج کروئی تمک۔ بلوچستان اٹ تعلیم نا آب ءِ بڑز کننگ واقعی اسہ چیلنج اسے ہرا سلاہ و شریکی نا کوشست آتیان دانا دوئی کننگ ءِ ممکن کننگ کیرہ۔ او پارینے کہ ارٹیفیشل انٹیلیجنس و روبوٹک ٹیکنالوجی نا ودوک آ اہمیت و افادیت نا سوب آن ننے تینا پوسکن آ چین ءِ پوسکن آ ٹیکنالوجی آن واقفیت و پوسکن آ لائخی تے ہیل تروئی تمک۔ دا خیال آتا درشانی ءِ او تدوک آ دے گورنر ہاوس کوئٹہ اٹ وائس چانسلر بیوٹمز یونیورسٹی ڈاکٹر خالد حفیظ آن اوڑدہی ٹی ہیت وگپ کرسا کرے۔ ہندا وخت اٹ پرنسپل سیکرٹری ٹو گورنر بلوچستان ہاشم خان غلزئی ہم ساڑی ئس۔ اوڑدہی ٹی ہائیر ایجوکیشن نا آب ءِ بڑز کننگ، جانجوڑ ءُ تعلیمی پڑ ءِ پک کننگ و خاص کر جاست و پاستی نا روشنائی ٹی اسٹوڈنٹس نا ذہن تے ساڑی سائنسی علم آن معلومدار کننگ آ ہیت وگپ کرے۔ او وخت آ گورنر بلوچستان ملک عبدالولی خان کاکڑ پارینے کہ نیچرل سائنسز و سوشل سائنسز نا کلاس آتیٹی درس تدریس نا وڑ و ڈول نا فرق ءِ تخوئی تمک۔ لیبارٹری ریسرچ اٹ لیبارٹری نا اوزار و گڑاتیان واقفیت و اوفتا کاریم اٹ اتنگ بھاز المی ءِ۔ یونیورسٹی نا طالبعلم آتے المی آسراتی و جانجوڑ ءُ چاگڑد اسے تون اوفتا کڑد آ جوان سجفر۔

(خ ن)