دنیا خواری تا ہنکین، ہچ ءُ ناجوڑی اس بے درمان اف، خطبہ حج

میدان عرفات( آن لائن ) شیخ عبداللہ بن سلیمان مسجد نمرہ اٹ خطبہ حج ترسا پارینے کہ دنیا غا بروک آ سختیک اللہ نا امتحان ءُ، اللہ نا پرمان آن سختیک بریرہ ولے اللہ ہچ ءُ دن ءُ ناجوڑی اس اتنے ہرانا درمان مف۔ کورونا اگہ آزمائشت اسے تو اللہ نا رحمت نا درگہ غاک ملوک ءُ، ننا گناہ تا سوب آن اللہ کریم ننے آزمائشت اسے نا گواچی کرینے، قرآن مجےد اٹ ارے کہ کم اٹ انگا مصےبت بھلا عذاب آن معلومدار کیک، دَین اٹ زیات آن زیات صدقہ و خیرات تننگے، سعودی عرب اٹ حج انا رکن اعظم وقوف عرفہ نا ادا کننگ آن پد روح پرور خطبہ حج ترسا شیخ عبداللہ بن سلیمان پارینے کہ نن گواہی ایتنہ کہ اللہ آن سوا پین کس اس عبادت نا لائخ اف او اسٹ ءِ، تقویٰ دوئی کننگ نا ہم پارسا پارینے کہ اللہ آن بیدس کس اسے نا عبادت ءِ کروئی اف او بیرہ داڑان کمک ہم خواہنگے، اللہ تعالیٰٰ ارشاد فرمائفے کہ کنا عبادت ءِ کننگے و کنتون کس ءِ شریک کننگپ۔ شیخ عبداللہ بن سلیمان خطبہ حج ترسا پارینے کہ اللہ تعالیٰ حضرت محمد ءِ گڈیکو نبی کرسا راہی کرینے، اللہ تینا بندغ آتا امتحان ءِ ہلیک و اگہ اوفک آزمائشت اٹ پورو مسر تو اللہ نا کنڈآن اوفتا خیال ءِ تخنگک، کورونا اگہ آزمائشت اسے تو اللہ تعالیٰ نا رحمت نا درگہ ملوک ءِ، ننا گناہ تا سوب آن اللہ کرےم ننے آزمائشت آتیٹی اختہ کرینے۔ قرآن مجےد اٹی ارے کہ کم اٹ انگا مصیبت آک بھلا عذاب آتیا معلومداری ءُ، دَین اٹ زیات آن زیات صدقہ و خیرات تننگے، مسجد نمرہ ٹی خطبہ حج ترسا او پارینے کہ قرآن اٹ اللہ ارشاد فرمائفک کہ نُم اگہ نعمت آتے حساب کننگ خوارے تو ولدا ہم حساب کننگ کپیرے تا، وخت اس کہ ہندا نعمت آتیا اللہ نا شکر ءِ ادا کننگے، کائنات اٹ دن ءُ ہچ ءُ گڑاس اف ہرادے اللہ تپک، ہر ہمو ہیت ہرا نما نفس و اُست اٹ ڈکھوک ءِ اودے ہم اللہ چاہک۔ مصیبت، سختی تا بننگ اللہ آن خڑک نا کمک ءُ، دا وخت آ معاشی وڑ اٹ ویل آتا گواچی ءِ۔ شریعہ اسلامیہ ہم پارینے کہ اللہ تینا بندہ غاتے ہُننگ خواہک، وخت اس کہ واپاری کروک آ واپارک اسہ ایلو نا کمک ءِ کیر تانکہ دا سخت انگا حالیت آتیان پیش تمن۔ او پارینے کہ اللہ سود ءِ حرام و چوری نا مال ءِ کُننگ ءِ حرام نا پارے، اوڑتون اوار او قرآن پاک نا ہندا آیت آتا حوالہ تس ہراٹی اسہ ایلو تون لین دین نا ذکر ءِ کننگانے۔ حقوق العباد نا اہمیت آ ہم زور شاغسا او پارینے کہ کس اسے نا حق ءِ بایدے خلنگپ، اسہ ایلو نا کمک ءِ بایدے کننگے وخت اس کہ اللہ ارشاد فرمائفینے کہ اللہ آن بیدس کس ءِ اسُل اوار شاغنگپ، داڑان پد لمہ باوہ نا احترام ءِ کننگے، وخت اس کہ اوفتا مون آ اف ہم کننگپ، لمہ باوہ نا مون آ خنتے شیف کرسا ہیت کننگے، دا المی ءِ کہ لمہ باوہ نا احترام ءِ کننگے۔ او پارینے کہ اللہ قرآن اٹ عدل و انصاف نا پرمان کیک و برائی آن بچنگ نا پاہک، اللہ ارشاد فرمائفینے کہ اگہ اہل ایمان نا اِرا ڈل آتیٹی جھیڑہ نا خرینی مرے تو نُم اوٹی نیام تمسا اودے ایسر کبو انتئے کہ مسلمان اسہ ایلو نا ایلم ءُ، اسلامی ریاست اٹ رہنگسا دا المی ءِ کہ ہراتم اودے نماز کن بٹنگے تو وضو نا انتظام ءِ کننگے خطبہ حج اٹ او فرمائفے کہ اللہ ہچ ءُ دن ءُ ناجوڑی اس اتنے ہرانا درمان مف، حضور فرمائفینے کہ طاعون زدہ انگا علاقہ ٹی نہ نی پترینگ و ہرافک ہمو علاقہ ٹی ساڑی ءُ اوفتے پیش تموئی اف۔ شیخ عبداللہ بن سلیمان پارینے کہ نبی کریم فرمائفینے اگہ جاگہ اس دَین اس تالان مریک تو اوڑے ہنپبو، و ہراڑے دَین تالان ءِ تو او جاگہ نا بندغ آک ہم پین جاگہ اس ہنپس۔