قلعہ عبداللہ ءِ 2 ضلع، لورالائی ءِ ڈویژن اس جوڑ کننگ نا منظوری

0

Get real time updates directly on you device, subscribe now.

کوئٹہ (آن لائن)حکومت بلوچستان ضلع قلعہ عبداللہ ءِ 2 ضلع جوڑ کننگ و لورالائی ڈویژن ٹہیفنگ نا منظوری تسنے۔ دو شنبے نا دے وزیراعلیٰ بلوچستان جام کمال خان نا کماشی ٹی مچ آ صوبہ ٹی پوسکن ءُ ڈویژن،ضلع و تحصیل جوڑ کننگ نا بابت بڑزکو کہولی دیوان اس مس۔دیوان اٹی صوبائی وزیرک میر ظہور احمد بلیدی، انجینئرزمرک خان اچکزئی، میر سلیم احمد کھوسہ، حاجی نور محمد دمڑ، مٹھا خان کاکڑ، حاجی محمد خان طور اتمان خیل، صوبائی سلاہکار ملک نعیم خان بازئی، عوامی نیشنل پارٹی نا پارلیمانی لیڈر اصغر خان اچکزئی ساڑی ئسر۔ دیوان اٹی ایڈیشنل چیف سیکرٹری ڈٹ بندی و شونداری، سینئرممبر بورڈ آف ریونیو، وزیر اعلیٰ نا پرنسپل سیکرٹری، ایڈووکیٹ جنرل، سیکرٹری خزانہ، سیکرٹری ایس اینڈ جی اے ڈی، سیکرٹری بلڈنگ، حوالکاری سیکرٹری تون اوار کمشنر کوئٹہ، کمشنر ژوب ہم ساڑی ئسر۔ دیوان ءِ سینئرممبر بورڈ آف ریونیو کمیٹی ناکنڈ آن صوبہ ٹی پوسکن ءُ ڈویژن، ضلع و تحصیل جوڑ کننگ نا بابت سلاہ سوج و شونداری ڈٹ آتے کن لینڈ الاٹمنٹ نا بابت ہم سرجم حوال تس۔ دیوان اٹی بلوچستان اٹی پوسکن ءُ ضلع و ڈویژن جوڑ کننگ نا بابت پیش کروک سلاہسوج آتا سرجم جاچ ہلنگا و اہم ءُ فیصلہ کننگا، دیوان اٹی وزیراعلیٰ بلوچستان ضلع قلعہ عبداللہ ءِ اِرا ضلع جوڑ کننگ و لورالائی ڈویژن جوڑ کننگ نا اصولی منظوری تس۔ وزیراعلیٰ مچ آ صوبہ ٹی پین ضلع و ڈویژن جوڑ کننگ کن کمیٹی نا کل باندات آتا جاچ ءِ ہلنگ و کاریم ءِ برجا تخنگ نا پارت کرے۔ دیوان آن تران کرسا وزیراعلیٰ بلوچستان جام کمال خان پارے کہ پوسکن ءُ ضلع و ڈویژن جوڑ کننگ آن سروس ڈیلیوری، مالی و انتظامی امور باندات آتا سر تننگ اٹ گچینی بریک۔ الس ءِ تعلیم، جانجوڑی و شاری آسراتیک اوفتے علاقہ غاتیٹی دوئی مریرہ۔ وزیراعلی بلوچستان محکمہ بورڈ آف ریونیو ٹی اصلاحات کن ریفارم کمیٹی جوڑ کرسا سلاہ پیش کننگ نا پارت کرینے، و پارے کہ ریونیو ڈیپارٹمنٹ بھاز اہم ءِ، دنیا بدل مننگ ءِ۔ بایدے نن ماڈرن ریونیو کلیکشن آ کان۔

Get real time updates directly on you device, subscribe now.

Leave A Reply

Your email address will not be published.