فنڈ آتا وخت آ کاریم اٹ اتنگ شونداری ءِ پک کننگ کیک، قدوس بزنجو

0

Get real time updates directly on you device, subscribe now.

کوئٹہ: وزیراعلیٰ بلوچستان میر عبدالقدوس بزنجو پارینے کہ شونداری فنڈ انا وخت آ جاری کننگ و اوفتا جوان کاریم اٹ اتنگ آن شونداری ہدف آتے دوئی کننگ مریک، بیرہ فنڈ آتا جاری کننگ گنج اس اف، صوبہ فنڈ آتا زیان یا لیپس مننگ ءِ سگنگ کپک، دا ہیت آتا درشانی ءِ او برجا مالی سال نا شونداری پروگرام اٹی اوار پوسکن و برجا ڈٹ آتا پیشرفت نا جاچ دیوان نا وخت آ کرے، سینئر صوبائی وزیر سردار محمد صالح بھوتانی و تعلقدار کمامدار آک دیوان اٹ بشخ ہلکر۔ ایڈیشنل چیف سیکرٹری ڈٹ بندی و شونداری سلمان مفتی و سیکرٹری خزانہ حافظ عبدالباسط دیوان ءِ شونداری ڈٹ آتے کن فنڈ انا اتھرائزیشن و جاری کننگ نا بابت بریفنگ تس۔ دیوان ءِ معلومدار کننگا کہ محکمہ خزانہ شونداری سکیم آتے کن داتم اسکان 70 ارب روپئی جاری کرینے، دیوان اٹی مالی سال انا چارمیکو کوارٹر اٹی فنڈ انا اتھرائزیشن و جاری کننگ نا کاریم تے پین ترند کرسا شونداری محکمہ غاتا نیام اٹ کوآرڈینیشن ءِ گچین کننگ و شونداری محکمہ غاتے کن پک کروک ہدف آتا دوئی کننگ نا پارت کننگا۔ دیوان اٹی سی ایس آر 2018ء اٹی اصلاحات نا منظوری ترسا دا رد اٹ سلاہ سوج آتے صوبائی کابینہ ٹی پیش کننگ نا پارت کننگا۔ داکان بیدس وزیر اعلیٰ بلوچستان میر عبدالقدوس بزنجو تدوک آ دے اسپیکر صوبائی اسمبلی میر جان محمد جمالی تون اوڑدہی کرے ہراٹی اہم انگا سیاسی ویل آتیا سلاہ کننگا۔ او وخت آ بلوچستان عوامی پارٹی نا جنرل سیکرٹری سینٹر منظور خان کاکڑ سینٹر نصیب اللہ بازئی، سنئیر صوبائی وزیر نور محمد دمڑصوبائی وزیر تیان سردار عبدالرحمان کھیتران میر محمد خان لہڑی میر نصیب اللہ مری عبدالرشید بلوچ مٹھا خان کاکڑ ہم ساڑی ئسر۔ اوڑدہی ٹی ملک انا سیاسی حالیت آتیا ہیت و گپ کننگا اوڑدہی ٹی وزیراعظم نا خلاف تحریک عدم اعتماد اٹ پارٹی نا دوئی کروک موقف نا ہروڑ اٹ جاچ ءِ ہلنگا۔ اوڑدہی ٹی پارٹی نا تنظیمی ویل آتیا ہم ہیت وگپ کننگا۔ اوڑدہی ٹی انٹرا پارٹی الیکشن نا زوت اس کرفنگ، پارٹی ءِ دوئی مروک آ ویل آتا ایسری نا جاچ اکن پارٹی نا سلاہی کمیٹی نا دیوان ءِ بٹنگ انگ آ امنا کننگا وخت اس کہ اوڑدہی ٹی صوبہ ٹی بلدیاتی گچین کاری تا اڈ تننگ نا بابت ویل آتیا ہم ہیت وگپ و پارٹی نا تیاری نا جاچ ءِ ہلنگا۔

Get real time updates directly on you device, subscribe now.

Leave A Reply

Your email address will not be published.