ملک انا فیصلہ ءِ قوم کیک، وزیر اعظم استیفہ تننگ آن نمن

اسلام آباد: وزیراعظم عمران خان پارینے کہ یک شنبے آ بے پتی تحریک آ وونٹ بٹنگ آن پد ملک انا مزل پیدوار مریک، استیفہ تفرہ، اخریکو گیند اسکان مون ایتوہ۔ قوم آن تینا تران اٹی وزیراعظم عمران خان پارے کہ ہرا بندغ آتیا کرپشن نا دوبہ ءِ، نیب اٹ کیس آک ءُ، ہموفک کنے اینک کننگ کن مونی بسنو۔ قوم ءِ فیصلہ کروئی ءِ کہ ملک انا مون ءِ ہرانگ ایتے۔ ہروئی تمک کہ دیر تینا ضمیر نا رد اٹ فیصلہ کیک، نن ورنا تے انت کلہو تننگ اُن؟ چَپی ٹنگر تینے ہم تو کس منپک کہ دا مسٹ نظریاتی ءُ۔ ہنوک آ باسک آتے کن وزیراعظم نا پاننگ ئس کہ نم تینے مدامی کن لپی کرینرے، نئے مخلوق نمے بشخک نئے گیرام کیک۔ میر جعفر و صادق انگریز آتتون کمکار مرسا تینا قوم ءِ مے جوڑ کریر، دا ساڑی دور انا میر جعفر و میر صادق آک ءُ۔ بروک آ نسل آک دافتے بشخپسہ۔ ای اومیت کیوہ کہ سندھ ہاؤس اٹ تولوک ننا بندغ آک تینا ضمیر نا رد اٹ فیصلہ اس کیرہ۔ کنے پرچی یا وراثت اٹ وزارت ملتنے، ای جہد کرسا داڑے سر مسنٹ۔ او پارے کہ 7 یا 8 مارچ آ ننے امریکہ (اسہ ملک اسے) آن اسہ کلہو اس بس، کنے ملک انا پن ءِ ہلوئی اَلو، اوفتے مہالو آن سما ئس کہ بے پتی تحریک اس بننگ اٹی ءِ، ہراڑان پاش ءِ کہ اپوزیشن مہالو آن پیشن نا تتون حالی حوالی ئس، دا پاکستان نا حکومت آ آخا عمران خان ناآ خار اٹی ءُ۔ وزیراعظم پارے کہ دا آفیشل دستاویز اسے، ہرادٹی پاکستانی سفیر ءِ پاننگا کہ اگہ عمران خان وزیر اعظم سلیس تو حالیت آک خراب مریرہ و پاکستان کن خواری ودک۔ قوم آن سوج کہ گڑا ننا دا حیثیت ءِ؟ وزیراعظم پارے کہ انٹیلی جنس ایجنسی تے کل انا بیک گراؤنڈ نا سما مریک، دا راہشون تا بابت ہم اوفتے کل سما ءِ، کہ اوفتا میرات آک ہراڑکنو؟ دا مسہ بندغ اوفتے دوست بسنو۔ اِرا پارٹی نا دور حکومت اٹ 10 سال اٹی 400 ڈرون جلہو مسر، وکی لیکس اٹی مولانا فضل الرحمان نا بابت پاننگا کہ پاکستان اٹی امریکی سفیر ءِ مولانا فضل الرحمان پارے کہ کنے اقتدار اٹی اتبو، ای ہم ہمون کیوہ ہرا وڑ کہ ایلوفک کیرہ۔ نواز شریف مودی تون ڈکوئی اٹ ملاکہ، آصف زرداری ءِ ڈرون تیٹی خلنگوک بے قصور تا چرت اَلوکہ۔ شہباز شریف پاہک کہ عمران خان ایبسلوٹلی ناٹ پارسا ردینک اس کرے، نن امن تون اُن، جنگ اتون افن، نن اسہ آجو خارجہ پالیسی اس خوانہ۔او پارے کہ خودداری آجو قوم انا نشانی مریک، ہراڑے انصاف مف اوڑے قومک بھس مریرہ، مسلمان قوم مے مننگ کپک۔ اللہ ننے اشرف المخلوقات جوڑ کرینے، فرشتہ غاتیان ہم بھلو درجہ اس تسنے، ولے ہراتم ایمان کمزور مریک تو پیسہ و خلیس است اٹ جاگہ کیک۔عمران خان پارے کہ ای مدام پاریٹہ کہ کس انا مون آ کاٹم ءِ شیف کپرہ، نئے قوم انا کاٹم ءِ شیف کرفوہ۔ ای بسٹ تو فیصلہ کریٹ کہ ننا خارجہ پالیسی آجو مریک۔