ہسپتال کن ازباب فراوانی آن الس ءِ گچین طبی آسراتی دوئی مریک،چیئرمین میونسپل کمیٹی دالبندین

بابائے چاغی پینل نا راہشون و چیئرمین میونسپل کمیٹی دالبندین میر فیصل جان نوتیزی ڈی ایچ کیو ہسپتال دالبندین کن اسہ اہم و تاریخی ءُ گام اس ہرفینے، السی تپہ غاک اونا بھاز ستا ءِ کرینو۔ سرجم حوال آتا رد اٹ میر فیصل جان نوتیزی ہسپتال کن مردہ خانہ (مارچری)، پوسکنوڑ ڈیجیٹل ایکسرے مشین و ایلو المی طبی ازباب فراوان کرے۔ فراوان کروک آ ازباب آتے وائس چیئرمین میونسپل کمیٹی دالبندین سردار حفیظ میرانزی، ملک خلیل نوتیزی، برج لعل، میونسپل کمیٹی نا کونسلر عبدالجلیل سمالانی، پرشوتم لعل و سردار سرفراز پنجوزی ہسپتال نا میڈیکل سپرنٹنڈنٹ ڈاکٹر لونگ خان عیسیٰ زئی نا دوٹی تسر۔ دا وخت آ فوکل پرسن جواد مینگل، چاغی کرکٹ ایسوسی ایشن نا صدر حیدر عاجز، کونسلر اجمل نوتیزی، عارف نوتیزی، میونسپل کمیٹی نا بابو عبدالصمد نوتیزی، بابو امیر حمزہ ساسولی، سرفراز ریکی تون اوار زند انا چندی بشخ آتتون تعلق تخوک آ شخصیت آک ہم ساڑی ئسر۔ ازباب آتا فراوانی نا وخت آ وائس چیئرمین سردار حفیظ میرانزئی، ایم ایس ڈاکٹر لونگ خان عیسیٰ زئی و اقلیتی کونسلر برج لعل گپ و تران کرسا دا السی آسراتی گام انا ستا ءِ کرسا پاریر کہ مردہ خانہ، پوسکنوڑ ڈیجیٹل ایکسرے مشین و ایلو طبی آسراتی تا فراوانی آن نئے بیرہ ڈسٹرکٹ ہیڈ کوارٹر ہسپتال نا لائخی ٹی ودکی مریک بلکن مچ آ رخشان ڈویژن نا الس ءِ ہم جوان طبی آسراتی دوئی مریک۔ او پاریر کہ رخشان ڈویژن اٹی دا تینا وڑ انا اولیکو ڈٹ ءِ، انتئے کہ مچ آ رخشان ڈویژن اٹی دا وخت اسکان مردہ خانہ نا آسراتی ساڑی اَلوکہ، ہرا نا سوب آن لاوارث و درست مفروک آ میت آتے رکھوک تخنگ نا بابت بھاز خواری پیش بسکہ۔ داسہ ڈسٹرکٹ ہیڈ کوارٹر ہسپتال دالبندین اٹی دا آسراتی نا ساڑی مننگ آن بھلو کچ اسے ٹی خواری تیٹی کمتی بریک۔ او پاریر کہ پوسکنوڑ ڈیجیٹل ایکسرے مشین نا اتنگ ہم وخت انا اہم ءُ گرج اس ئسکہ، ہراڑان ناجوڑ آتے وخت آ و آب اٹو تشخیصی آسراتی دوئی مریک۔ دا اہم انگا ڈٹ آ چیئرمین میر فیصل جان نوتیزی ءِ خراجِ تحسین پیش کینہ و اومیت درشان کینہ کہ او آخبت اٹی ہم السی خذمت نا ہندن انگا ڈٹ آتے برجا تخو۔ دالبندین (محمد بخش بلوچ)