”ریجنل ٹریڈ اینڈ انویسٹمنٹ فیسیلیٹیشن پارٹنرشپ“ کن کاریم کننگ اُن،جام کمال خان

بنجائی وزیر واپار جام کمال خان تون سینٹرل ایشیا ریجنل اکنامک کوآپریشن (کیئرک) سیکرٹریٹ نا ڈل اوڑدہی کرے۔ وزارت واپار نا ترجمان نا رداٹ اوڑدہی ٹی وزیر واپار جام کمال خان ءِ سیکرٹریٹ نا باسک ملک آتا نیام اٹ واپار، رابطہ، زرکاری و زرگزرانی انضمام ءِ سوگو کننگ کن اہم علاقائی گام گیج آتا بارواٹ حوال تننگا۔ ڈل وزیر واپار ءِ معلومدار کرے کہ ایشیائی ترقیاتی بینک انا کنڈ آن بروک آ ہفتہ غاتیٹی ”بارڈر کنیکٹیویٹی اینڈ لاجسٹکس اپ گریڈ فیسیلٹی“ نا منظوری نا اومیت ارے، ہرا نا مسخت پاکستان نا سیمی بنداوی پنجر نا جدید کاری ٹی کمک کننگ و علاقائی واپار و رابطہ غاتے مونی دننگ ءِ۔ ڈل وزیر واپار ءِ پارے کہ پاکستان ”ریجنل ٹریڈ اینڈ انویسٹمنٹ فیسیلیٹیشن پارٹنرشپ“ (CARIF) فریم ورک نا نفاذ کن کاریم کننگ ءِ، دا فریم ورک داسہ تینا عملی ریسہ ٹی پترینگ انگ ءِ تانکہ ڈیہہ اٹی واپاری آسانی، لاجسٹکس نا بشخ اٹ کمکاری و زرکاری ءِ مون آ دننگ مرے۔ دیوان اٹ منگولیا ٹی 29 و 30 ستمبر 2026 آ مروک آ کیئرک وزارتی کانفرنس و بزنس فورم نا تیاری تا جاچ ءِ ہلنگا۔ دا وخت آ کیئرک سیکرٹریٹ بنجائی وزیر ءِ کانفرنس اٹ بشخ ہلنگ نا باضابطہ سلہ خلسا پارے کہ دا کانفرنس اٹ کیئرک (CAREC) مچ آ ڈیہہ آن وزیرآک، بڑزکو سرکاری کارندہ غاک، شونداری شریدار آک، جہانی زرکارو نجی بشخ انا نمائندہ غاک بشخ ہلیرہ۔ ڈل بنجائی وزیر ءِ معلومدار کرے کہ بزنس فورم اٹ لاجسٹکس، توانائی نا رکھ، اہم معدنیات، ڈیجیٹل رابطہ، زرکاری نا وارخواہی و نجی بشخ انا تین پہ تینی کمکاری آ چکار کننگک۔ ڈل ایشیائی ترقیاتی بینک انا کمکاری اٹ کیئرک ڈیہہ انا چیمبرز آف کامرس اینڈ انڈسٹری نا نیام اٹ کاروباری کہول آ کمکاری ءِ سوگو کننگ کن ”ریجنل چیمبرز الائنس“ نا جوڑ کننگ نا ڈٹ آتا بارواٹ ہم معلومدار کرے۔ بنجائی وزیر واپار علاقائی زرگزرانی انضمام ءِ مون آ دننگ اٹ کیئرک و ایشیائی ترقیاتی بینک انا برجا کمکاری نا ستاءِ کرے و علاقائی واپار، رابطہ و زرکاری نا بشخ اٹ تین پہ تینی کمکاری ءِ سوگو کننگ کن پاکستان نا عزم انا درشانی ءِ کرے۔