جی سیون و جی ایٹ انڈرپاس ءِ اگست یا ستمبر اٹ الس کن ملنگک،علی نواز اعوان

اسلام آباد (اے پی پی) وزیراعظم نا خصوصی کمکار سی ڈی اے باندات علی نواز اعوان پارینے کہ جی سیون و جی ایٹ انڈر پاس ءِ اگست یا ستمبر نا اول اٹ الس کن ملنگک، راول ڈیم انا کنڈآہراویل آک بسرہ اوفک ہم ایسر مریرہ، ماسٹر پلان آ پین کاریم مننگ ءِ، اسلام آباد نا شاری تے دیر انا ویل آتے ایسر کننگ کن کوشست کننگ اُن۔ داخیال آتا درشانی ءِ او خصوصی کمکار جی 7و جی 8 انڈرپاس نا برجا شونداری کاریم نا دورہ ءِ کننگ نا وخت آ میڈیا تون گپ وتران کرسا کرے۔ خصوصی کمکار چارشنبے نادے آ جی سیون و جی ایٹ انڈرپاس انا دورہ ءِ کرے ہراڑے او کاریم تا جاچ ءِ ہلک۔ داوخت آ سی ڈی اے و ایلو کمامدارآک ہم ساڑی ئسر۔ دورہ غان پد میڈیا تون گپ وتران کرسا وزیراعظم نا خصوصی کمکار پارے کہ اسہ سال انا گونڈ ءُ وخت اسے ٹی جی 7 و جی 8 انڈرپاس ءِ تیار کرین، انڈرپاس ءِ اگست یا ستمبر نا اول اٹ الس کن ملنگک۔ اوپارے کہ دا انڈرپاس ءِ ملنگ آن داڑے ہراہڑدے ٹریفک نا رش مریک او کم مریک۔ خصوصی کمکار پارے کہ کورنگ بریج آ ہم کاریم نا بناءِ کننگانے او ہم زوت پورو مریک۔ اوپارے کہ راول ڈیم انا کنڈآ ہرا ویل آک بسرہ اوفک ہم ایسر مریرہ۔ خصوصی کمکار پارے کہ اسلام آباد ءِ ڈائریکٹ فنڈنگ ملپک، پی ایس ڈی پی ٹی فنڈنگ تننگک۔ اسہ سوج اسے نا ورندی ٹی خصوصی کمکار پارے کہ اسلام آباد نا ماسٹر پلان آ پین کاریم مننگ ءِ، اسلام آباد نا اولیکو ماسٹر پلان ءِ 6 لکھ مخلوق کن جوڑ کننگاسس ولے داسہ بنجائی دارالحکومت نا آبادی 22 لکھ مسنے۔ اوپارے کہ داسکان ماسٹرپلان آ کاریم سلوک ءِ انتئے کہ ننے آن مست اسٹ اس ہم داڑاتو کاریم کتنے۔ اوپارے کہ اسلام آباد نا مخلوق کن دیر انا ویل آتے ایسر کننگ کن کوشست کننگ اُن۔