9 اگست آ شجرکاری مہم اٹی ریکارڈ دہ لکھ درخت خلنگک، عثمان ڈار

اسلام آباد (اے پی پی) وزیراعظم نا خصوصی ورنا باندات کمکار عثمان ڈار پارینے کہ 9 اگست آ شجرکاری مہم اٹی ریکارڈ دہ لکھ درخت خلنگک، پارلیمنٹ نا باسک آک، ورناک و غٹ پاکستانیک زیات آن زیات داٹی بشخ ہلیر، مسلم لیگ (ن) ءِ مناظرہ نا چیلنج کیوہ کہ ساڑی دور حکومت اٹ سرسہب ورناپروگرام میرٹ و شفافیت آٹے وخت اس کہ مستین است پسند بندغ آتے لیپ ٹاپ و وام تننگاکہ، اپوزیشن وزیراعظم عمران خان نا ہرگام گیج ءِ شیف خلیک ولے دنیا اونا گام گیج آتے امنا کننگ ءِ۔ داخیال آتا درشانی ءِ او چارشنبے نادے آ پنجاب انفارمیشن ٹیکنالوجی بورڈ انا کنڈآن وزیراعظم ٹائیگر فورس انا منشاکار آتیکن تیار کروک موبائل ایپ انا بناءِ کننگ آن پد پریس کانفرنس آن تران کرسا کرے۔ اوپارے کہ موبائل ایپ انا کمک اٹ ورنامنشاکارآک وزیراعظم ٹائیگر فورس اٹ رجسٹرڈ مننگ کیرہ، منشاکارآک دا ایپ انا کمک اٹ کورونا غان بچنگ نا ایس او پی تا خلاف ورزی نا پیدواری ءِ کننگ کیرہ وخت اس کہ داٹی گرین سیلفی نا فیچر ہم ساڑی ءِ، او نیال اس خلسا داٹی تینا عکس ءِ ہم مون تننگ کیرہ، شجرکاری مہم اٹ ریکارڈ درخت خلنگ کن ٹائیگر فورس ءِ اوار کننگ انگ ءِ۔ وزیراعظم اسہ دے اٹی زیات آن زیات نیال خلنگ نا ریکارڈ اس جوڑ کننگ نا پڑو ءِ کرینے۔ اوپارے کہ 9 اگست آ ٹائیگر فورس ڈے ءِ اڈتننگ نا فیصلہ کننگانے، دادے آ بھلو کچ اسے آ شجرکاری مہم نابناءِ کننگک، 9 اگست آ وزیراعظم نا کماشی ٹی ریکارڈ شجرکاری کننگک، اسہ دے اٹی غٹ آن زیات 10 لکھ نیال خلنگک، خیبر پختونخوا حکومت 5 لکھ درخت خلنگ نا زمواری ءِ ہلکونے، مہالو ہم خیبر پختونخوا حکومت اسہ ارب درخت خلکونے۔