بلوچستان ناکشاری بشخ اکن 4 ارب 1 کروڑ 21 لکھ روپئی جتا

اسلام آباد (اے پی پی) بلوچستان حکومت بروک آ مالی سال 2020-21ءنا سرکاری بشخ انا شونداری پروگرام اٹی کشت وکشار نا بشخ انا شونداری کن 4 ارب 1کروڑ 21 لکھ روپئی جتا کرینے۔ بجٹ دستاویز آتا رداٹ حکومت غیر شونداری بشخ اکن، 11 ارب 71 لکھ روپئی جتا کرینے وخت اس کہ صوبہ ٹی محکمہ کشت وکشار نا بحالی کن 775,640 ملین روپئی تخنگانے۔ حکومت بلوچستان مالی سال 2019-20ءٹی کشاری پیداوار نا گچینی کن مچ آ صوبہ نا زمیندار و کشارگر آتے ٹی 31445کلو گرام کشاری بج، 5229کشاری اوزار و 7387 روئی نا لوت بشخاسس۔ ملخ آتا جلہو آتیان ہم کشاری پیداوار اٹی پیدوار کمتی بسنے، ہراڑکن دسمبر 2019ءٹی ملخ ایمرجنسی نا پڑو ءِ کننگاسس۔ ملخ آتا خطرہ غاتارداٹ، محکمہ کشت وکشار دانا توننگ کن 181 ٹیم جوڑ کریسس و بروک آ مالی سال 2020-21ءاٹی اسپرے کننگ و ملخ آتا خطرہ غاتا مون ءِ توننگ کن ایلو بنداوی گام گیج کننگ کن 500 ملین روپئی تخانے وخت اس کہ برجا مالی سال 2019-20ءاٹی، دارداٹ 404 ملین روپئی نا زر جاری کننگاسس۔ صوبہ نا کشاری پیداوار ءِ جہانی منڈی تسکان رسینگ فراوان کننگ کن، بروک آ مالی سال 2020-21ءاٹی اسہ کشاری ایکسپو اسے نا بست و بند کننگک۔ صوبہ ٹی پوسکن آ کشارگری ءِ مون آ دننگ کن 11 ضلع غاتے ٹی 85 سرنگ فارم آتے کشاری پیداوار اٹی ودکی کننگ کن شمسی توانائی تون گنڈنگانے۔ مالی سال 2020-21ءاٹی حکومت میرانی ڈیم کمانڈ ایریا فیز2، سبکزئی ڈیم فیز III، کچی کینال کمانڈ ایریا ءِ شون تننگ نا گام گیج آتیا سجفنگ ءِ ہراڑان لکھ آ ایکڑ بنجر ڈغار تا دسنگ اٹ کمک رسینگک۔ مالی سال 2020-21ءاٹی، صوبہ ٹی کشار گر آتے کھد آ سبسڈی تننگ کن 24 ملین روپئی تخنگانے۔ ساڑی حکومت کشاری کارندہ و پیداوار نا بشخ انا تکنیکی عملہ نا لائخی تیٹی ودکی کن فنڈز طے کننگ نا فیصلہ کرینے۔ محکمہ کشت وکشار اٹ غٹ ضلعی و ڈویڑنل آفیسر آتے اسہ ہزار فیلڈ اسسٹنٹ، گاڈی و موٹرسائیکل آتا فراوانی کن حکومت بلوچستان بجٹ 2020-21ءاٹی فنڈ جتا کرینے۔ بروک آ مالی سال اٹی قلعہ سیف اللہ و قلات ضلع غاتے ٹی کولڈ اسٹوریج نا جوڑ کننگ کن 100 ملین روپئی جتا کننگانے۔ مالی سال 2020-21ءاٹی کشت وکشار نا بشخ اکن 263 پوسکن ءُ پوسٹ ٹہیفنگانے۔