گلگت بلتستان :سی ٹی ڈی پولیس نا کارروائی 5کارندہ غاتتون اوار 7 بندغ زوال

چلاس( آن لائن)چلاس ما رونئی خلق اٹ دوبہ دار و سی ٹی ڈی پولیس نا نیام اٹ سم کاری آن 5 کارندہ غاتون اوار 7 بندغ تپاخت کریر وخت اس کہ 5 کارندہ ٹھپی مسر، نگران وزیراعلیٰ گلگت بلتستان آئی جی آن واقعہ نا رپورٹ ءِ بٹنگانے۔ پولیس نا رداٹ سی ٹی ڈی گلگت دوبہ دار آتا دزگیری کن نن نیمہ اسکان چلاس نا رونئی خلق اٹ اسہ اُرا سے آ چھاپہ خلک۔ ڈکھوک آ دوبہ دار آتا ہند انا بابت ڈکھوک ءُ ڈس اسے نا کم کاٹ آپریشن کننگا ہراڑے سم کاری آن سی ٹی ڈی نا اسہ سب انسپکٹر سہراب و 5 ورنا شہید و 5 ٹھپی مسر وخت اس کہ سم کاری نا مقابلہ ٹی 2 شاری ہم خلنگار۔ پولیس نا پاننگ ءِ کہ ٹھپی آ کارندہ غاتے ریسکیو 1122 آر ایچ کیو ہسپتال چلاس آ گدریفنگانے۔ شہید کارندہ غاتے ٹی انسپکٹرسہراب، سپاہی جنید علی، سپاہی شکیل، سپاہی اشتیاق و سپاہی غلام مرتضی اوار ءُ۔ سم کاری آن اظہار اللہ و بشارت پنی ءُ بندغ اس تپاخت کرینو۔ پولیس کمامدار آتا رداٹ ٹھپی آ کارندہ غاتے ٹی سب انسپکٹر نبی جان، سپاہی شکر، سپاہی ہدایت کریم، سپاہی شان و سپاہی محمد علی اوار ءُ۔ سی ٹی ڈی نا کارروائی ٹی کم ازکم 15 کارندہ غاک بشخ ہلکر۔ ایلو کنڈ آ نگران وزیراعلیٰ گلگت بلتستان میر افضل خان چلاس واقعہ نا نوٹس ءِ ہلسا آئی جی پی گلگت بلتستان آن واقعہ نا رپورٹ ءِ بٹنگانے۔ نگران وزیراعلیٰ گلگت بلتستان شہید آتا خاہوت آتون ہڑزخواہی کرے و اوفتے خراج عقیدت پیش کرینے وخت اس کہ ٹھپی تے جوان طبی کمک تننگ نا پارت کرینے۔