اُلس بروک آ منہ دے اٹ زیات پام کے‘ لیاقت شاہوانی

کوئٹہ( آن لائن )حکومت بلوچستان نا ترجمان لیاقت شاہوانی بلوچستان نا اُلس آن خواست کرینے کہ بروک آ منہ دے اسکان زیات پام کننگے، عئید آن پد کیس آتیٹی ودکی مس تو سخت لاک ڈان نا کنڈ آ کانہ، مالو کیس آک جوڑ مسر ولے ادارہ غاتے ٹی وس الو کہ اوفک نتیجہ غاتے مون آ اتیر، ولے داسہ ساڑی حکومت ادارہ غاتے ٹی اصلاحات اتنگ اٹی ءِ ۔ تانکہ وڈی خوری نا بابت اٹ کیس آتیا کاریم ترند مرے۔ دا خیال آتا درشانی ءِ او پریس کانفرنس آن تران کرسا کرے۔ او بلوچستان نا اُلس آن خواست ءِ کہ بروک آ منہ دے اسکان زیات پام کننگے عئید آن پد کیس آک اگہ ودار تو سخت لاک ڈاون نا کنڈ آ کانہ۔ چنکا عئید انا وخت آ شاری تا کنڈآن ایس او پی تیا عمل درآمد کپننگ نا سوب آن 70 درسد کیس آک ودار، اگہ اُلس کمک کپک تو مارکیٹ آتے بند کننگ نا نوٹیفکیشن ءِ جاری کننگ کینہ، ہندا دے تیٹی کس اس ایس او پی تا خلاف ورزی ءِ کیک تو تھانہ غاتے ٹی بند مریک۔ لیاقت شاہوانی پارینے کہ 25 جولائی آ کل ٹیسٹ آتا بیرہ 6 درسد پازیٹو بس،26 جولائی آ3.5 و 27 جولائی آ 4.5 درسد ٹیسٹ پازیٹو بسر، خوش قسمتی آن بلوچستان اولیکو صوبہ مننگ کیک کہ ہراڑے کورونا نا کیس آک چٹر، دا وخت آ بلوچستان اٹ 86.5 درسد ریکوری ریٹ ارے۔ صوبہ ٹی کیس آتیٹی بھاز کمتی بسنے، اگہ کیس آتیٹی مستی ہم کمتی برسا کرے تو عئید آن پد کل ادارہ غاتے ملنگک۔