امریکی فوج جنگ بندی معاہدہ نا خلاف ورزی کننگ آ ایران ءِ خلک،امریکی صدر ڈونلڈ ٹرمپ
ہندن ءُ وخت اس ہم بننگ کیک کہ نن پین سگ انادرشانی نا وڑ اٹ سلپن، فوجی وڑ اٹ کاریم تے سر تننگ آ بیوس کننگپ
Get real time updates directly on you device, subscribe now.
امریکی صدر ڈونلڈ ٹرمپ پارینے کہ امریکی فوج جنگ بندی نا معاہدہ نا خلاف ورزی آ ایران ءِ شست کرینے۔ سوشل میڈیا غا اسہ بیان اسے اٹی او پارے کہ ایرانی میزائل و ڈرون کوڑی کروک ہند و ریڈار ہند آتیا جلہو کرینن۔ ٹرمپ پارینے کہ ہندن ءُ وخت اس ہم بننگ کیک کہ نن پین سگ انا درشانی ءِ کپن، و ننے فوجی وڑ اٹ ہمو کاریم ءِ سر تننگ آ بیوس کننگپک ہرادے نن سرسہبی اٹ بنا کریسن۔ امریکی صدر مستی پارے کہ اگہ ہندن مس تو اسلامی جمہوریہ ایران نا وجود چٹک‘۔ امریکہ ایران آ اسہ وار ولدا جلہو کرینے، امریکی سینٹرل کمانڈ (سینٹ کام) پارینے کہ آبنائے ہرمز اٹی پانامہ نا بیروک والا ٹینکر جہاز آ ایرانی ڈرون جلہو نا ورندی ٹی ایران اٹی کیہی فوجی ہدف آتیا فضائی کارروائی کننگانے۔ سینٹ کام پارینے کہ ایران نا فوجی چاروکی نظام، حوالکاری وشینکاری نا ہند، فضائی دفاعی میرات‘ ڈرون کوڑی ہند و بارودی سرنگ نا لائخی والا ہند آتے شست کننگا۔ سینٹ کام نا رداٹ کارروائی صدر ٹرمپ نا پارت آ کننگانے۔ ایلو کنڈ آ ایرانی میڈیا نا رداٹ سِرک و قشم اٹی دھماکہ غاتا توار بسنے۔ سِرک اٹی ٹیلی کمیونیکیشن ٹاور نا شست مننگ نا حوال ءِ۔ امریکہ تدوک آ دے سہب انا ہم ایران آ فضائی جلہو کریسس ہرا نا بابت ایران اونا بے سہب مننگ نا دعویٰ کریسس و پارے کہ ورندی اٹی ڈیہہ انا کیہی امریکی فوجی ہند آتے شست کرینن، اوکان پد بحرین ایرانی ڈرون جلہو تا دوبہ خلک۔ دا وخت آ امریکہ و ایران اسہ ایلو آ ”اسلام آباد مفاہمتی یادداشت“ نا خلاف ورزی نا دوبہ غاتے خلکر۔ ایران نا موقف ءِ کہ امریکہ جلہو کرسا اسلام آباد مفاہمتی یادداشت نا شق نمبر 5 نا خلاف ورزی ءِ کننگ اٹی ءِ۔ باندات ہمو وخت آ بنا مس ہراتم اقوام متحدہ آبنائے ہرمز اٹی گٹ ماہی گیر آتے کشنگ نا آپریشن امریکی فوج انا چاروکی ٹی بنا کرے۔ اولیکو ریسہ اٹی 1100 ماہی گیر و 27 بحری جہاز آتے آبنائے ہرمز اٹی عمان نا کرک انا کنڈ آن کشنگا۔ ایہن دا جہاز آک ایران نا موکل آن بیدس کشنگ انگ ئسر، ہندا سوب آن خلیج عمان آن گدرینگوک آ اسہ جہاز اسے آ پروجیکٹائل فائر کننگ نا واقعہ تدوک آ دے پیش بس ہراڑا جہاز ءِ نسخان رسینگا۔ امریکہ دوبہ خلک کہ دا جلہو ءِ چار ڈرون تا کمک اٹ ایران کرینے۔ دا دوبہ غان پد امریکی صدر ڈونلڈ ٹرمپ پارے کہ دا اسہ ہڑدے ئی ءُ جلہو اس ئس و صحافی نا سوج آ پارے کہ نمے امریکی ردعمل نا زوت سما تمک۔ اونا بیان آن منہ ساہت پد امریکہ ایران نا کرکی علاقہ غاتیا جلہو کرے۔ پاسداران انقلاب اسہ بیان اسے اٹی پارینے کہ ایرانی جزیرہ سِرک آ امریکی فضائی جلہو تے بے سہب کننگانے۔ اوکان پد شنبے نا دے سہب انا ڈرون تا کمک اٹ اسہ بھلو جلہو اس بحرین آ کننگا ہرا نا بحرینی وزارت خارجہ سخت مذمت ءِ کرے۔