انڈیا نا کنڈ آن چلینگوک سم تا جوان ءُ پد اس مفک، چینی میڈیا 

لندن (آن لائن) انڈیا و چین نا نیام اٹ سیم آ بے چیٹی تے کم کننگ کن فوجی و سفارتی کہول آ کوشست آک برجا ءُ، ولے ہڑتوم آ ملک آتا میڈیا ٹی دا موضوع آ متضاد ءُ بیان شینک مننگ اٹی ءُ۔ چینی حکومت نا زیر اثر اخبار گلوبل ٹائمز اسہ رپورٹ اس شینک کرینے ہراٹی ہندن پاننگانے کہ انڈیا نا کنڈآن چلینگوک آ سم تا ‘خراب ءُ نا نتیجہ’ اس مریک۔ برطانوی نشریاتی ادارہ نا رپورٹ نا رداٹ اخبار تجزیہ کار آتا بابت اٹ نوشتہ کرینے کہ سیم آ انڈیا نا کنڈآن فوجی تا کچ اٹ ودکی و اوفتے چین اتون جھڑپ اسے ٹی سم چلیفنگ نا موکل تننگ نا فیصلہ ہڑتوم آ ملک آتا نیام اٹ بے چیٹی ٹی ودکی کیک و انڈیا کن ہم دانا خطرناک ءُ نتیجہ مریرہ۔ گلوبل ٹائمز نوشتہ کرینے کہ ‘دا ہیت ہندا حالیت آتیٹی مننگ اٹی ءِ ہراتم انڈیا چین تون بے چیٹی تے کم کننگ آ رضامندی نا درشانی ءِ کرینے۔ ہڑتوم آ ملک آتا فوجی کمانڈر آتا کہول نا مذاکرات اٹ دا پک مسوسُس کہ فرنٹ لائن آ فوجی تا کچ اٹ پین ودکی کننگپک، ولے انڈیا وعدہ غا ایمانداری نشان تننگ اٹی اف ہراڑان بے چیٹی ٹی ودکی مننگ کیک۔