وکیل آتا ویل آتا ایسری کن بار آتتون رابطہ ءِ پین گچین کینہ، اعظم نذیر تارڑ

بنجائی وزیر کانود و انصاف سینیٹر اعظم نذیر تارڑ پارینے کہ وکیل آتا ویل آتے ایسر کننگ و انصاف نا گچین فراوانی کن بار ایسوسی ایشن تتون رابطہ غاتے پین گچین کننگک۔ ترجمان نا رداٹ بنجائی وزیر کانود تون تدوک آ دے چندی بار ایسوسی ایشن تا عہدیدار و وکیل راہشون آک اوڑدہی کریر، ہراٹی وکیل آتا کسبی باندات و بار ایسوسی ایشن نا بابت باندات آتیا گپ و تران کننگا۔ راولپنڈی ہائی کورٹ بار ایسوسی ایشن و راولپنڈی ڈسٹرکٹ بار ایسوسی ایشن نا صدر و عہدیدار آک ہم بنجائی وزیر کانود تون اوڑدہی کریر و وکیل آتے مون تروک چندی ویل آتا بابت اودے معلومدار کریر۔ ہائی کورٹ بار ایسوسی ایشن بہاولپور نا صدر، خانیوال ڈسٹرکٹ بار ایسوسی ایشن، جہانیاں بار ایسوسی ایشن و کبیر والا بار ایسوسی ایشن نا صدر و عہدیدار آک ہم بنجائی وزیر کانود تون اوڑدہی کریر۔ سینیٹر اعظم نذیر تارڑ بار ایسوسی ایشن تا نمائندہ غاتے بخیر کرے۔ و انصاف نا گچین فراوانی و کانودی نظام نا گچینی ٹی وکیل آتاکڑد ءِ اہم گوندا۔ اوڑدہی تیٹی تین پہ تینی رابطہ و کانودی بشخ اٹی کمکاری نا مون آ دننگ نا عزم انا درشانی ہم کننگا۔