شوگر مافیا نا برخلاف کریک ڈاﺅن نا پک فیصلہ

اسلام آباد ( آن لائن) حکومت شوگر مافیا نا برخلاف کریک ڈاﺅن نا بھلو فیصلہ اس کرینے، شوگر کمیشن رپورٹ نا بنداو آ ایف بی آر، نیب، ایس ای سی پی و ایف آئی اے ءِ جاست و پاست نا پرمان تننگانے، وزیر اعظم عمران خان نا پارت آ سلاہکار احتساب و داخلہ بیرسٹر شہزاد اکبر گورنر اسٹیٹ بینک، مسابقتی کمیشن و ہر مسٹ انگا صوبہ غاتے چٹھی نوشتہ کرینے۔ چٹھی تتون اوار شوگر کمیشن رپورٹ ہم راہی کننگانے۔ وزیر اعظم عمران خان پارینے کہ وڈی خور آ بندغ آتے اوفتا کروک آتا سزا تننگک۔ حکمران آک تینٹ اختہ مفس تو وڈی خور آ بندغ آک راج اٹ رہنگ انگ کپسہ۔ چٹھی ٹی بنجائی حکومت ادارہ غاتے90 دے اٹ عمل درآمد رپورٹ پیش کننگ نا ہم پارت کرینے۔ حکومت ایف بی آر ءِ مچ آ ملک انا کل شوگر مل آتے آڈٹ کننگ نا پارت جاری کرینے۔ ایف بی آر ءِ شوگر مل تا بے پن ٹرانزیکشن نا جاست و پاست کننگ نا پرمان تننگانے۔ ادارہ غاتے راہی کروک آ چٹھی تیٹی پاننگانے کہ نیب شوگر کمیشن نا نتیجہ غاتا رداٹ زموار آتے درست کننگے، ،سٹیٹ بینک چینی مڈی نا سٹی کاریم اٹ اتنگ و شکبر برآمدات آتا جاست و پاست ءِ کے، چٹھی تے ٹی شوگر مل آتے سبسڈی تننگ آن پد گنڈیری نا کشت و کشار نا کم مننگ نا جاست و پاست نا پرمان ہم جاری کننگانے، اسٹیٹ بینک ءِ کل شوگر مل آتا بابت جامع رپورٹ پیش کننگ نا ہم پارت کننگانے۔ ایف آئی اے و ایس ای سی پی ءِ کارپوریٹ فراڈ نا جاست و پاست نا پارت کننگانے۔ ایس ای سی پی آتے زموار آتا درست کننگ و کانود نا رداٹ عمل درآمد نا پارت کننگانے۔ چٹھی ٹی مسابقتی کمیشن آن شوگر مافیا تا برخلاف گام گیج آتیٹی اُرے کننگ آ وضاحت بٹنگ انگانے و مستی پاننگانے کہ مسابقتی کمیشن سوب ءِ درست کننگے کہ شوگر کارٹل نا برخلاف ہچ ءُ ایکشن اس ہلنگتو۔ مسابقتی کمیشن ءِ شوگر کارٹل نا کنڈآن ذخیرہ اندوزی و یوٹیلٹی اسٹور تیٹی بورہ نا اتنگ نا جاست و پاست انا پرمان کننگا۔ بنجائی حکومت پنجاب، خیبر پختونخوا و سندھ انا چیف سیکرٹری تے راہی کروک آ چٹھی تیٹی پارینے کہ صوبائی حکومت آک شوگر کمیشن رپورٹ ءِ مون آ تخسا جتا جتا شوگر مل آتا جاست و پاست ءِ کے و گنڈیری نا کشت و کشار آن کم نہاد آ گنڈیری ہلوک آ شوگر مل آتا برخلاف کانودی چارہ جوئی کننگے۔ چٹھی ٹی پاننگانے کہ جتا جتا شوگر مل آتا معاملہ صوبائی محکمہ اینٹی کرپشن نا دوٹی بریک، صوبائی حکومت آتے شوگر مل آتا کنڈآن گنڈیری کشارگر تے سود آ قرض تننگ نا جاست و پاست انا پرمان تے جاری کننگانے۔ چٹھی ٹی پاننگانے کہ شوگر ملز مالک آتا کنڈآن اُرے کننگا، شوگر مافیا نا برخلاف بلیک میل کننگ نا کوشست آتے بے سہب کننگانے۔