گچین کانود جوڑ کرسا وڈی خوری ءِ چٹفنگ خوانہ، شاہ محمود قریشی
اسلام آباد (اے پی پی) وزیرخارجہ مخدوم شاہ محمود قریشی پارینے کہ حکومت آک کارہ بریرہ وخت اس کہ کانود جوڑ کننگ اسہ پک ءُ عمل اسے، گچین کانود جوڑ کننگ نا کمک اٹ وڈی خوری ءِ چٹفنگ خوانہ، ولے داہم خوانہ کہ وڈی خوری نا پن آ کس اسے بے شرف کننگپ۔ دوشنبے نادے آ تینا اسہ بیان اسے ٹی وزیر خارجہ پارے کہ گڑاس کانود آتا بابت ننا موقف اسٹءِ وخت اس کہ اپوزیشن نا اسہ پین موقف اسے۔ ننا و اپوزیشن نا نیام اٹ نکتہ نظر نا نیام اٹ پرخ ءِ اواری اٹ تولسا پک کننگ و گچین کانود جوڑ کننگ کن 24 باسکی پارلیمانی کمیٹی اس جوڑ کننگانے۔ داپارلیمانی کمیٹی نا اسہ دیوان اس مسنے وخت اس کہ ارٹ میکو ہم زوت مریک۔ اوپارے کہ نن ایف اے ٹی ایف، نیشنل سیکورٹی و نیب اتون تعلقدار مسودہ غاتے تینا اپوزیشن نا سنگت آتیا گدریفینن۔ کنے اومیت ءِ کہ اپوزیشن نا خواجہ غاک فراخ دلی اٹ دا مسودہ غاتے ہریرہ و ولدا نن اواری اٹ دافتیا گپ وتران کینہ۔ وزیر خارجہ پارے کہ نن دا ملک اٹ گچین کانود جوڑ کننگ نا کمک اٹ وڈی خوری ءِ چٹفنگ خوانہ ولے داڑتون اوار اوار نن دا ہم خوانہ کہ وڈی خوری نا پن آ کس اسے بے شرف کننگپ۔ وڈی خوری کانود نا مسخت کس اسے ناروا تنک کننگ اف، ولے ہمو مخلوق ہرافک دا ملک ءِ بے دردی اٹ پُلانو اوفتے اوفتا کروک نا سزا ترفنگے۔ ننا کوشست ہندادے کہ اسہ ہندن ءُ کانود اس مرے ہرا دا ہڑتوم آ کچ آتیا پورو برے۔