بلوچستان اسمبلی آن صوبائی مالیاتی مسودہ کانود 2023 منظور
مالی سال 2023-24 نا سالانہ و مالی سال 2022-23 نا ضمنی خڑچ آتا منظور مروک گوشوارہ غاک ایوان نا میز آ تخنگار
Get real time updates directly on you device, subscribe now.
کوئٹہ: بلوچستان اسمبلی بلوچستان مالیاتی مسودہ کانود 2023ءِ منظور کرے وخت اس کہ مالی سال 2023-24 اناسالانہ و مالی سال 2022-23 انا ضمنی خڑچ آتا منظور مروک گوشوارہ ءِ ایوان اٹ تخنگا۔جمعیت علماء اسلام نا باسک مولانا نوراللہ دیوان آن بائیکاٹ کرے۔ بلوچستان اسمبلی نا دیوان سَے شنبے نادے یک ونیم گھنٹہ ہُرے آ ڈپٹی اسپیکر سردار بابر موسیٰ خیل ناکماشی ٹی بنا کرے۔ صوبائی وزیر خزانہ انجینئر زمرک خان اچکزئی بلوچستان مالیاتی مسودہ کانود2023 ءِ ایوان اٹ پیش کرے‘ ہرادے ایوان منظور کرے‘ اوکان گڈ وزیر خزانہ مالی سال 2023-24 انا سالانہ و مالی سال 2022-23 انا ضمنی منظور مروک پک گوشوارہ غاتے ایوان نا میز آ تخا۔ او صوبائی وزیر خزانہ ءِ سلاہ تس کہ پی ایس ڈی پی ٹی یکم جولائی آن شونداری عمل نا بناءِ کننگے تاکہ ٹینڈر مرے و صوبہ ٹی ہرا 7 آن 8تو انا شونداری عمل سلک اوڑا دمدستی عملدرآمد شروع بنا کے تاکہ بلوچستان اٹ ایلو صوبہ غاتیانبار شونداری مننگ کے‘ اسمبلی دیوان اٹ پوائنٹ آف آرڈر آ تینا خیال آتا درشانی ءِ کرسا جمعیت علماء اسلام نا باسک میر یونس زہری پارے کہ پی ایس ڈی پی ٹی بجلی ٹرانسمیشن کن 4کروڑ نا جاگہ غا 2کروڑ جاری کننگ آن ہمو ٹرانسمیشن لائن پورو مفک‘ ہندا سوب آن ای وزیرخزانہ ءِ سلاہ ایتوہ کہ او ایلو گڑاتیان پیسہ کشسا بجلی کن چار کروڑ جاری کے تاکہ دا ڈٹ وخت آ پورو مننگ کے۔ بلوچستان نیشنل پارٹی نا صوبائی اسمبلی نا باسک و پبلک اکاؤنٹس کمیٹی نا چیئرمین اختر حسین لانگو پارے کہ ای جوان ءُ بجٹ اس پیش کننگ آ وزیراعلیٰ و وزیر خزانہ ءِ مبارکبادی ایتوہ‘ ای ہم یونس زہری نا سلاہ تون امنا کیوہ کہ گوازی‘ کیسکو‘ و جانجوڑی نا بابت ڈٹ آتیکن 100درسَد فنڈ جاری کننگے تاکہ دا ڈٹ آک وخت آ پورو مننگ کیر۔ اوپارے کہ اینو نا دیوان اٹ وزیرداخلہ بلوچستان میر ضیاء اللہ لانگو و چیف سیکرٹری بلوچستان ہم ساڑی ءِ‘ صوبہ ٹی امن وایمنی کن ارب آروپئی تے جتا کننگ نا جاگہ غا دا پیسہ غاتے شونداری کن خڑچ کننگے‘ صوبہ ٹی امن تو ایہن اف ہر جاگہ غا ریاست سلہ بند جتھہ غاتا کمک اٹ امن ءِ خراب کننگ اٹی ءِ۔ ایف سی وایلو ادارہ غاتے ارب آروپئی تے تننگ غریب صوبہ تون بیدادی آنبار ءِ۔ حکومت ہرا 60ارب روپئی ءِ امن کن تخانے ہندافتے تعلیم‘ جانجوڑی کنوئی آ دیر و شونداری ڈٹ آتیا خڑچ کننگے انتئے کہ بلوچستان نا کل ضلع غاتے ٹی سلہہ بند ٹولیک ساڑی ءُ ریاست تینٹ ہندا سلہہ بند ٹولی تے فنڈ جاری کرسا اوفتا است بڈی ءِ کننگ اٹی ءِ تاکہ صوبہ نا امن وایمنی ءِ خراب کننگ مرے۔
(مانیٹرنگ ڈیکس)