یادگار شہدا غا جلہو نا زموار آتا احتساب ستا کڑزک، خواجہ آصف

اسلام آباد : وزیر دفاع خواجہ آصف پارینے کہ فوجی ملکیت و شہید آتا یادگار تیا جلہو نا زموار بندغ آتے سزا تننگ ستا کڑز‘ انسانی اسمگلنگ نا برخلاف ریاست ءِ پورو واک اٹ جلہو کروئی مریک‘ گچین کاری تے ٹی ہچ ءُ اڑاند اس نظر بفننگ ءِ‘ گچین کاریک تینا وخت آ مریرہ‘ نواز شریف تون مروک بیدادی تے بایدے چٹفنگے۔ میڈیا تون ہیت وگپ کرسا خواجہ آصف پارے کہ جلہو نا زموار سویلین تا کس تے ملٹری کورٹ آتے ٹی چلیفنگ نا بابت ہیت مننگ اٹی ءِ‘ کانود ءِ حرکت اٹ اتنگ کن اڑاند آتیان ایپار مننگ انگ ءِ ہرافتیان ایپار مریک‘ سوشل میڈیا غا رکھ خلنگ نا آپشن ہر وخت ساڑی ءِ و داڑا عمل ہم مننگ کیک۔ خواجہ آصف پارے کہ 9 مئی نادوبہ دار تانکہ سزا رسینگپک بیرہ پارٹی آ رکھ خلنگ ویل انا ایسر اف‘ سوشل میڈیا یورپ و چین اٹ ہم ریگولیٹ مننگ اٹی ءِ بایدے داڑے ہم مرے۔ وزیر دفاع پارے کہ ہر جاگہ غا سوشل میڈیا ءِ مانیٹر کننگک‘ داڑے سوشل میڈیا غامخلوق ءِ بغاوت کن وگائفنگک۔ اوپارے کہ انسانی اسمگلنگ نا برخلاف ریاست ءِ پورو واک اٹ جلہو کروئی مریک۔ سعودی عرب اٹ منشیات نا سزا سرقلم ءِ‘ اینو مخلوق منشیات دننگ ءِ‘ تعلقدار ادارہ غاک انسانی اسمگلنگ ءِ توننگ کن تینا کڑدار ءِ ادا کیر۔ مسلم لیگ ن نا راہشون پارے کہ گچین کاری تے ٹی اڑاند نظر بفننگ ءِ‘ گچین کاریک وخت آمریرہ‘ نوازشریف تون بھلو بے انصافی اس مس‘ مار آن تنخواہ ہلپننگ آ نابود گوندنگا۔ بنجائی وزیر پارے کہ پانامہ کیس اٹ 4 سَد آن زیات پاکستانی تا پن ئس نوازشریف نا پن ہم الو‘ اوڑا کیس کننگا‘ اودے مار آن تنخواہ ہلپننگ آ دروغ نا کیس اٹ نابود گوندنگا۔

(آن لائن)