مست انا تیان چَپ عمران خان بلوچستان آ چکار کننگ ءِ، جام کمال

کوئٹہ(خ ن) وزیراعلیٰ بلوچستان جام کمال خان کوئٹہ ویسٹرن بائی پاس روڈ، ڈیرہ مراد جمالی بائی پاس و زیارت موڑ کچ ہرنائی سنجاوی روڈ نا تفنگ نا بنداو ءِ تخنگ نا دود آن تران کرسا پارینے کہ مستین نا حکمران آتیان چَپ وزیراعظم عمران خان بلوچستان نا شونداری و اونا الس نا ویل آتیا خاص چکار کرینے، و تینا وار وار نا دورہ غاتا کمک اٹ بلوچستان و بلوچستان نا باندات تیان است خواہی نا درشانی ءِ کرینے۔ وزیراعلیٰ پارے کہ ہراتم آن نن حکومت اٹ بسنن، ننا دا کوشست مسنے کہ بلوچستان ءِ شونداری نا ہندن ءُ کسر اسے آ شاغنگے کہ ہرانا مزل شونہال، پرامن، و شوندار صوبہ اس مرے، ہراڑے الس ءِ جانجوڑی، تعلیم، کنوئی دیر، روزگار و کاروابار نا غٹ آسراتیک بریبری نا بنداو آ دوئی مریر۔ وزیراعلیٰ پارے کہ دا بیرہ ننا دعویٰ اف و نئے تغ اسے، بلکن تدوک آ دونیم سال اٹی نن عملی وڑ اٹ دا گام گیج آتے عملی دروشم تننگ کن اسہ راست ءُ مون اس ہرفسا پیشرفت نا بناءِ کرینن، ہرانا مثبت بھرم زند انا ہر بشخ آ تمنگ اٹی ءِ، و صوبہ نا الس دا بدلی تا تینٹ ہم آزموندہ ءِ کننگ اٹی ءِ۔ وزیراعلیٰ پارے کہ کوئٹہ شارانا شونداری صوبائی دارالحکومت مننگ نا سوب آن ننا اولیت آتیٹی اوار ءِ۔ کوئٹہ شار انا شونداری کن کم و وَد 40ارب روپئی نا شونداری ڈٹ ڈَول آ کاریم برجا ءِ۔ اہم انگا ڈَٹ ڈَول آتیٹی پوسکن آ سڑک آتا تفنگ، فلائی اوور جوڑ کننگ، اسپورٹس کمپلیکس، پوسکن ءُ پارک تفنگ دائے اوار ءِ۔ وزیر اعلیٰ پارے کہ مستین نا حکموت آک بلوچستان اٹی بیرہ تختی خلکر، و ڈٹ ڈَول آتا ٹینڈر جاری کریر، ولے عملی وڑ اٹ دا بابت ہچ ءُ کاریم اس متو، و نئے ڈغار آ گڑاس خننگا۔ ننا حکومت صوبہ نا غٹ علاقہ غاتیٹی بریبری نا بنداو آ شونداری عمل نا بناءِ کرینے، صوبہ ٹی اولیکو وار کارڈیک سنٹر یو اے ای گورنمنٹ نا کمک اٹ جوڑ مننگ اٹی ءِ۔ دا کارڈک سنٹر 120 بسترہ غا تالان ءِ، ہرانا 70 درسَد کاریم پورو مسنے، ہندن حکومت اولیکو وار صوبہ ٹی کینسر ہسپتال تفنگ انگ ءِ۔ بلوچستان اٹی اولیکو وار ہندن ءُ شونداری کاریم منن گاٹی ءِ، ہرانا مستین ہچ ءُ درور اس رسینگپک۔ بلوچستان نا ہمو ضلع غاک ہرا پد تمانو، اوفتے شونداری نا کسر آ راہی روان کننگ کن گام گیج کننگ انگ ءِ، مچ آ صوبہ ٹی ڈیم جوڑ کننگ انگ ءِ، او وزیر اعظم ءِ پارے کہ بلوچستان نا غٹ ضلع غاتا شونداری، مچ آ صوبہ نا شاہراہ تا جال تالان کننگ و صوبائی دارالحکومت کوئٹہ ٹی شونداری نا بابت نی ہرا وڑ است خواہی درشان کرینس، نن اوڑکن نا منتوار اُن۔ و اومیت ءِ کہ نی مستی ہم ہندا وڑ بلوچستان تون تینا است خواہی ءِ برجا تخوس۔