نوکنڈی ٹی مسافر گاڈی آ سم کاری بھلو بیداد اسے، نیشنل پارٹی

نوکنڈی: نیشنل پارٹی نوکنڈی نا پریس ریلیز اسے ٹی پارینے کہ نوکنڈی نا ماس آ مسافر بردارگاڑی آ ضلعی انتظامیہ نا کنڈآن سم کاری آن ڈرائیور و مسافر آتے ٹھپی کننگ و نیاڑی و چناتیا سم کاری بھلو بیدادی اسے۔ بلوچستان حکومت وڈی جی لیویز آن خواست کینہ کہ نوکنڈی نا ماس آ نیاڑی و چناتیا سم کاری کروک آ ضلعی انتظامیہ نا اختہ انگا کارندہ غاتا برخلاف زوت اس کانودی کارروائی کرسا اوفتے سزا تننگے۔ داڑان بیدس ایلو نوکنڈی اُلس تون ملسا سخت برانز کینہ۔ بیان اٹ پاننگانے کہ نوکنڈی مالو آن امن و ایمنی نا بابت اٹ بھس ئس۔ دز و داڑیل آتا راج ءِ۔ داسہ ہیت داڑسکان سر مسنے کہ کانود نا خیال کروک و اُلس نا رکھ ءِ کروک آک تینٹ داوڑ نا بیدادی کننگ اٹی ءُ۔ نیاڑی و چناتیا سم کاری کننگ نا موکل نہ کانود ایتک و نہ اسلامی بلوچی و قبائلی روایت آتیٹی دا اوار ءِ۔ بیان اٹ پارینے کہ اگہ انتظامیہ نا کنڈآن دا پاننگ انگ ءِ کہ گادی ءِ تورنگ نا اشارہ کننگاسس ولے او سلتنے۔ دانا دا ایسری اف کہ ڈائریکٹ ڈرائیور یا نیاڑی و چناتتون اوار ایلو مسافر آتیا سم کاری کننگے۔ دا سرکاری دہشت گردی پاننگک۔ نیشنل پارٹی دانا مذمت ءِ کرسا خواست کیک کہ زوت اس زموار آ کارندہ غاتے معطل کرسا اوفتا برخلاف کانودی وعدالتی کاروائی کننگے تانکہ اُلس اٹ تالان آ بے چیٹی و غم مر مرے۔

(آن لائن)