پاکستان مسلم لیگ (ن) پاکستان جوڑ کننگ اٹ تاریخی کڑد ادا کرینے،گورنر بلوچستان

کوئٹہ، گورنر بلوچستان جعفرخان مندوخیل کرسچن کمیونٹی نا نمائندہ و مسکوہی بنجائی وزیر خلیل جارج نا اوار مننگ نا جلسہ غان تران کرسا پارے کہ اینو اوار مننگ نا جلسہ پاکستان مسلم لیگ (ن) کن اہم ءُ مزل نا نشان اسے، ہراڑآن پارٹی نا دوارہ سیوت و متحرک مننگ نا درشانی مریک، او مسکوہی بنجائی وزیر خلیل جارج ءِ کرسچن کمیونٹی نا داخس انگا بھلا اواری جلسہ نا اڈ تننگ آ مبارک بادی تس۔ گورنر بلوچستان دا ہیت آتے کوئٹہ ٹی مسکوہی بنجائی وزیر خلیل جارج نا کماشی ٹی کرسچن کمیونٹی نا کنڈ آن اڈ تروک آ اوار مننگ نا جلسہ غان تران کرسا کرے، جلسہ ٹی گورنر بلوچستان نا بننگ آ منتظم و شریدار آک بش مرسا اودے بھاز جم وجوش اٹ بخیر کریر۔دا وخت آ گورنر بلوچستان جعفرخان مندوخیل پارے کہ پاکستان مسلم لیگ (ن) ہمو جماعت ءِ ہرا پاکستان جوڑ کننگ اٹ تاریخی کڑد ادا کرینے، قائد اعظم محمد علی جناح نا دوٹی ہرا قومی بیرک ئس اینو ہمو بیرک ءِ مسلم لیگ (ن) نا قائد محمد نواز شریف ہرفینے او پارے کہ ساڑی سرکڑدہ غاک ملک ءِ مشکل زرگزرانی حالیت آتیان کشنگ و ڈیفالٹ نا خطرہ غان بچفنگ کن اہم گام گیج کرینو۔ گورنر بلوچستان پارے کہ وزیراعظم محمد شہباز شریف، فیلڈ مارشل سید عاصم منیر و ایلو قومی سرکڑدہ غاک پاکستان نا سرسہب خارجہ پالیسی نا کمک اٹ ڈیہہ اٹی امن و سوگوی کن اہم کڑد ادا کریر، او خاص وڑ اٹ ایران و امریکہ نا نیام اٹی جنگ بندی و مذاکرات کن پاکستان نا سفارتی کوشست آتا ذکر ءِ کرے گورنر مندوخیل پارے کہ بھرمی سفارت کاری و جہانی کہول آ پاکستان نا مثبت کڑد آن دنیا ٹی ملک انا شرف اٹی ودکی مسنے او پارے کہ ملکی سیوت و سیاسی ہم آہنگی ءِ تینائی کرسا بلوچستان اٹی حکومت جوڑ کننگ کن پاکستان پیپلز پارٹی ءِ وارخواہی تننگا، ایہن تو پاکستان مسلم لیگ (ن) تون حکومت جوڑ کننگ کن درکار کچ ساڑی ئس، دا فیصلہ قومی و صوبائی فائدہ غاتے مون آتخسا کننگا۔